தமிழ்த்துளி Tamil Drops: பாழ் என்னும் வெட்டவெளி

நினைப்புப் பேயே

நினைப்பே

கேள்

பரத்தில் சென்றாலும் – அகப்பேய் – பாரிலே மீளுமடி

பரத்துக்கு அடுத்த இடம் – அகப்பேய் – பாழது கண்டாயே

பஞ்ச முகமேது – அகப்பேய் – பஞ்சு படுத்தாலே

குஞ்சித பாதமடி – அகப்பேய் – குருபாதங் கண்டாயே

ஐந்து எழுத்துகளை, சிவனுக்கு ஐந்து முகங்கள் என்கின்றனர். இது எப்படிச் சரியாகும். குஞ்சிதபாதம் (தூக்கி வளைத்த காலடி) காட்டி அவன் ஆடுகிறான். அவன் என் குரு.

பங்கம் இல்லையடி – அகப்பேய் – பாதம் இருந்தவிடம்

கங்கையில் வந்ததெல்லாம் – அகப்பேய் – கண்டு தெளிவாயே

அவன் அடி வெட்டவெளியில் ஆட்டம் காட்டுகிறது. கங்கை நீரில் அவன். - இவற்றை உன்னிப் பார்த்து உணர்ந்துகொள்.

தானற நின்றவிடம் – அகப்பேய் – சைவங் கண்டாயே

ஊனற நின்றவர்க்கே – அகப்பேய் – ஊனமொன்று இல்லையடி

அவன் தன்னைக் காட்டிக்கொள்ளாமல் இருக்கும் இடந்தான் சைவம். உடம்பு இல்லாமல் அவன் இருப்பதால் அவனுக்கு ஊனம் ஒன்றும் இல்லை.

சைவம் ஆருக்கடி – அகப்பேய் – தன்னை அறிந்தவர்க்கே

சைவ மானவிடம் – அகப்பேய் – சற்குரு பாதமடி

சைவம் ஆருக்கு வேண்டும்? தன்னை அறிந்தவருக்குத்தான் வேண்டும். சைவம் (சிவம்) எங்கே இருக்கிறது? சற்குரு பாதத்தில் இருக்கிறது.

அகப்பேய்ச் சித்தர் பாடல்கள்

அகம் என்னும் தன் நினைவைப்

பேய்ப்பெண்ணாக உருவகப்படுத்திக்கொண்டு,

அவளை விளித்துக் கூறும் அறிவுரையாக,

பிறருக்குக் கூறும்

விளையாட்டுக் கண்ணி - பாடல் -- 55 / 90

தமிழ்த்துளி Tamil Drops