பூச்சி காட்டி விளையாடுதல் Play with insects

 பூச்சி காட்டி விளையாடுதல்.

கலித்தாழிசை

மெச்சூது சங்கம் இடத்தான் நல் வேய் ஊதி

பொய்ச் சூதில் தோற்ற பொறையுடை மன்னர்க்காய்

பத்தூர் பெறாது அன்று பாரதம் கைசெய்த

அத்தூதன் அப்பூச்சி காட்டுகின்றான்

அம்மனே. அப்பூச்சி காட்டுகின்றான். 1

மலை புரை தோள் மன்னவரும் மா ரதரும் மற்றும்

பலர் குலைய நூற்றுவரும் பட்டு அழியப் பார்த்தன்

சிலை வளையத் திண் தேர்மேல் முன்னின்ற செங்கண்

அலவலை வந்து அப்பூச்சி காட்டுகின்றான்

அம்மனே. அப்பூச்சி காட்டுகின்றான். 2

காயும் நீர் புக்குக் கடம்பு ஏறி காளியன்

தீய பணத்தில் சிலம்பு ஆர்க்கப் பாய்ந்து ஆடி

வேயின் குழல் ஊதி வித்தகனாய் நின்ற

ஆயன் வந்து அப்பூச்சி காட்டுகின்றான்

அம்மனே. அப்பூச்சி காட்டுகின்றான். 3

இருட்டில் பிறந்து போய் ஏழை வல் ஆயர்

மருட்டைத் தவிர்ப்பித்து வன் கஞ்சன் மாளப்

புரட்டி அந்நாள் எங்கள் பூம்பட்டுக் கொண்ட

அரட்டன் வந்து அப்பூச்சி காட்டுகின்றான்

அம்மனே. அப்பூச்சி காட்டுகின்றான். 4

சேப் பூண்ட சாடு சிதறி திருடி நெய்க்கு

ஆப்பூண்டு நந்தன் மனைவி கடை தாம்பால்

சோப்பூண்டு துள்ளித் துடிக்க அன்று

ஆப்பூண்டான் அப்பூச்சி காட்டுகின்றான்

அம்மனே. அப்பூச்சி காட்டுகின்றான். 5

செப்பு இள மென் முலைத் தேவகி நங்கைக்கு

சொப்படத் தோன்றித் தொறுப் பாடியோம் வைத்த

துப்பமும் பாலும் தயிரும் விழுங்கிய

அப்பன் வந்து அப்பூச்சி காட்டுகின்றான்

அம்மனே. அப்பூச்சி காட்டுகின்றான். 6

தத்துக் கொண்டாள் கொலோ? தானே பெற்றாள் கொலோ?

சித்தம் அனையாள் அசோதை யிளஞ்சிங்கம்

கொத்தார் கருங்குழல் கோபால கோளரி

அத்தன் வந்து அப்பூச்சி காட்டுகின்றான்

அம்மனே. அப்பூச்சி காட்டுகின்றான். 7

கொங்கை வன்கூனி சொல் கொண்டு குவலயத்

துங்கக் கரியும் பரியும் இராச்சியமும்

எங்கும் பரதற்கு அருளி வன் கானடை

அங்கண்ணன் அப்பூச்சி காட்டுகின்றான்

அம்மனே. அப்பூச்சி காட்டுகின்றான். 8

பதக முதலை வாய்ப் பட்ட களிறு

கதறிக் கைகூப்பி என் கண்ணா. கண்ணா. என்ன

உதவப் புள்ளூர்ந்து அங்கு உறு துயர் தீர்த்த

அதகன் வந்து அப்பூச்சி காட்டுகின்றான்

அம்மனே. அப்பூச்சி காட்டுகின்றான். 9

தரவு கொச்சகக்கலிப்பா

வல்லாள் இலங்கை மலங்கச் சரம் துரந்த

வில்லாளனை விட்டு சித்தன் விரித்த

சொல்லார்ந்த அப்பூச்சிப் பாடல் இவை பத்தும்

வல்லார் போய் வைகுந்தம் மன்னி இருப்பரே. 10

பெரியாழ்வார் திருமொழி 2-1

அப்பூச்சி காட்டுதல்