தாலாட்டு Lullaby 1-4

மாணிக்கம் கட்டி வயிரம் இடைகட்டி

ஆணிப்பொன் னால்செய்த வண்ணச் சிறுத்தொட்டில்

பேணி உனக்குப் பிரமன் விடுதந்தான்

மாணிக் குறளனே. தாலேலோ

வையம் அளந்தானே. தாலேலோ. 1

மாணிக்கமும் வயிரமும் பதித்த தங்கத் தொட்டிலைப் பிரமன் அனுப்பியிருக்கிறான் 

உடையார் கனமணி யோடு ஒண் மாதுளம்பூ

இடைவிரவிக் கோத்த எழில் தெழ்கி னோடு

விடையேறு காபாலி ஈசன் விடுதந்தான்

உடையாய் அழேல் அழேல் தாலேலோ

உலகம் அளந்தானே தாலேலோ. 2

மணி, மாதுளம்பூ, தெழ்கு - கோத்த தொட்டிலை ஈசன் அனுப்பியிருக்கிறான்

எந்தம் பிரானார் எழில்திரு மார்வர்க்கு

சந்தம் அழகிய தாமரைத் தாளர்க்கு

இந்திரன் தானும் எழிலுடைக் கிண்கிணி

தந்து உவனாய் நின்றான் தாலேலோ

தாமரைக் கண்ணனே தாலேலோ. 3

இந்திரன் கிண்கிணி அனுப்பியிருக்கிறான்

சங்கின் வலம்புரியும் சேவடிக் கிண்கிணியும்

அங்கைச் சரிவளையும் நாணும்அரைத்தொடரும்

அங்கண் விசும்பில் அமரர்கள் போத்தந்தார்

செங்கண் கருமுகிலே தாலேலோ

தேவகி சிங்கமே தாலேலோ. 4

வலம்புரிச் சங்கு, கிண்கிணி, சரிவளை, அரைஞாண் - அமரர்கள் அனுப்பியுள்ளனர்

எழிலார் திருமார்வுக்கு ஏற்கும் இவையென்று

அழகிய ஐம்படையும் ஆரமும் கொண்டு

வழுவில் கொடையான் வயிச்சிரவணன்

தொழுது உவனாய் நின்றான் தாலேலோ

தூமணி வண்ணனே தாலேலோ. 5

வச்சிர வண்ணன் மார்பில் அணிய ஐம்படைத் தாலி அனுப்பியிருக்கிறான்

ஓதக் கடலின் ஒளிமுத்தின் ஆரமும்

சாதிப் பவளமும் சந்தச் சரிவளையும்

மாதக்க வென்று வருணன் விடுதந்தான்

சோதிச் சுடர்முடியாய் தாலேலோ

சுந்தரத் தோளனே தாலேலோ. 6

முத்தாரம், பவளவளையல் - கடலரசன் வருணன் அனுப்பியிருக்கிறான்

கானார் நறுந்துழாய் கைசெய்த கண்ணியும்

வானார் செழுஞ்சோலைக் கற்பகத்தின் வாசிகையும்

தேனார் மலர்மேல் திருமங்கை போத்தந்தாள்

கோனே அழேல் அழேல் தாலேலோ

குடந்தைக் கிடந்தானே தாலேலோ. 7

துளசி மாலை, கற்பக வாசிகை - திருமகள் அனுப்பியிருக்கிறாள் 

கச்சொடு பொற்சுரிகை காம்பு கனவளை

உச்சி மணிச்சுட்டி ஒண்தாள் நிரைப்பொற்பூ

அச்சுதனுக் கென்று அவனியாள் போத்தந்தாள்

நச்சு முலையுண்டாய் தாலேலோ

நாராயணா அழேல் தாலேலோ. 8

கச்சம், சுரிகை, காம்பு வளையல், உச்சிச் சுட்டி, பொற்பூ - மண்மகள் அனுப்பியிருக்கிறாள்

மெய்திமிரும் நானப் பொடியோடு மஞ்சளும்

செய்ய தடங்கண்ணுக்கு அஞ்சனமும் சிந்துரமும்

வெய்ய கலைப்பாகி கொண்டு உவளாய் நின்றாள்

அய்யா அழேல் அழேல் தாலேலோ

அரங்கத்து அணையானே தாலேலோ. 9

கலை (ஆண்சிங்கம்) கொண்டவள் நானப்பொடி, மஞ்சள், சிந்தூரம், கண்ணுக்கு அஞ்சனம் - அனுப்பியிருக்கிறாள் 

மணிவண்ணா! அழாமல் உறங்கு - என்று கூறி ஆய்ச்சியர் கண்ணனைத் தாலாட்டுகின்றனர்

வஞ்சனையால் வந்த பேய்ச்சி முலையுண்ட

அஞ்சன வண்ணனை ஆய்ச்சி தாலாட்டிய

செஞ்சொல் மறையவர் சேர் புதுவைப்பட்டன் சொல்

எஞ்சாமை வல்லவர்க்கு இல்லை இடர்தானே. 10

வெண்டளையால் வந்த கலித்தாழிசை

பெரியாழ்வார் திருமொழி 1-3

பிள்ளைத்தமிழ் - தாலப் பருவம்