முதுமொழிக் காஞ்சி MutuMoliKanji 81-90

முதியோன்
மேனி
அழகு

9. நல்கூர்ந்த பத்து

ஆரவாரம் மிக்க உலகத்து மக்களுக்கெல்லாம் சொல்கிறேன்.

1. முறையில்லாமல் அரசாளும் மன்னன் நாடு வறுமையில் வாடும். 81
2. அதிக ஆண்டுகளாகி மூத்தவன் காமம் வறுமையில் வாடும். 82
3. பகைவனாகி உடனிருப்பவனின் சேர்க்கை பயனின்றி வறுமையில் வாடும். 83
4. நோயில் வருந்துபவன் பெற நினைக்கும் இன்பம் பெறமுடியாமல் வறுமையில் வாடும். 84
5. தன்னைப் போற்றாத கணவனிடம் போட்ட பிணக்கு தீர்க்கப்படாமல் வறுமையில் வாடும். 85
6. மூத்தவன் மேனி அழகு பெறமுடியாமல் வறுமையில் வாடும். 86
7. சொல் எடுபடாதபோது சொல்லும் சொல் பயன்றறு வறுமையில் வாடும். 87
8. வறுமை அடைந்தவன் வீட்டுக்குச் செல்வோன் எதுவும் பெற முடியாமல் வறுமையில் வாடும். 88
9. அச்சம் இல்லாத சினம் தாக்கப்பட்டு வறுமையில் வாடும். 89
10. நண்பர் அல்லாதவரிடம் செல்பவன் வறுமையில் வாடும். 90

பாடல்

9. நல்கூர்ந்த பத்து

ஆர்கலி உலகத்து மக்கட்கு எல்லாம்-

1. முறை இல் அரசன் நாடு நல்கூர்ந்தன்று. 81
2. மிக மூத்தோன் காமம் நல்கூர்ந்தன்று. 82
3. செற்று உடன் உறைவோனைச் சேர்தல் நல்கூர்ந்தன்று. 83
4. பிணி கிடந்தோன் பெற்ற இன்பம் நல்கூர்ந்தன்று. 84
5. தற் போற்றாவழிப் புலவி நல்கூர்ந்தன்று. 85
6. முதிர்வு உடையோன் மேனி அணி நல்கூர்ந்தன்று. 86
7. சொல் செல்லாவழிச் சொலவு நல்கூர்ந்தன்று. 87
8. அகம் வறியோன் நண்ணல் நல்கூர்ந்தன்று. 88
9. உட்கு இல்வழிச் சினம் நல்கூர்ந்தன்று. 89
10. நட்பு இல்வழிச் சேறல் நல்கூர்ந்தன்று. 90

மதுரைக் கூடலூர் கிழார் இயற்றிய முதுமொழிக் காஞ்சி (முதுமொழி = பழமொழி)

பதினெண்கீழ்க்கணக்கு நூல்களில் ஒன்று.

காலம் – கி.பி. 3 ஆம் நூற்றாண்டின் முற்பகுதி