அகநானூறு Agananuru 100

பெரியன் புன்னையங் கானலில் வம்ப நாரை

நீ பகலில் வந்து என்னோடு இருந்துவிட்டுப் பகலிலேயே போய்விடுவது எனக்கு இன்பமாகத்தான் இருக்கிறது. ஆனால், ஊர் மக்கள் அம்பல் பேசுகின்றனரே! என்ன செய்வேன் என்று தலைவி தலைவனிடம் கூறி நொந்துகொள்கிறாள்.

1

அரைத்த சந்தனம் பூசிக்கொண்டு மேன்மைக்காகப் பூ மாலை அணிந்துகொண்டிருக்கும் மார்பினை உடையவன் நீ.

2

பகலில் இங்கு வந்து உனது, எனது ஆகிய இரண்டு மார்பகங்களிலும் பதிவு உண்டாகும்படித் தழுவி வெளிச்சம் இருக்கும்போதே நீ பிரிந்து போய்விடுதல் எனக்கு இனியதுதான்.

3

கடலில் திரை முழக்கம் குறைந்து, இரவில் கீழைக்காற்று வீசும்போது, மீன் பிடிப்பவர் கடலுக்குள் செல்வர். விளக்கு வைத்துக்கொண்டு செல்வர். அது இரவு வேளையில் போர்வேந்தன் பாசறையில் இருக்கும் யானை அசைந்தாடுகையில் அதன் நெற்றியில் இருக்கும் ஓடை மின்னுவது போல இருக்கும்.

4

புன்னை மரங்கள் மிகுதியாக இருக்கும் ‘புன்னையங்கானல்’ என்னும் கடல்சார் சோலையைக் கொண்ட ஊர் புறந்தை. இந்த ஊரில் இருந்துகொண்டு பாடுபவர்களை எல்லாம் தடுத்து நிறுத்தி, குதிரைகளையும் தேர்களையும் வழங்கும் கைவளம் படைத்த கோமகன் பெரியன்.

5

அவன் ஊரில் புதிய நாரை இனங்கள் (வெளிநாடுகளிலிலுந்து வந்த புதிய நாரைக்கூட்டம்) ஒலிப்பது போல ஊர் நம் உறவு பற்றிக் காதோடு காதாகப் பேசுகிறது.  

6

பொழுது புலரும் விடியற்காலத்திலேயே சென்ற எருமை நெய்தல் பூக்களை மேயும். தாழம்பூ பூத்துக் கிடக்கும் நீர்ச்சோலையில் மேயும். இப்படிப்பட்ட ஊரில் வாழும் மக்கள் அம்பல் பேசுகின்றனர். நான் என்ன செய்வேன்.

பாடல் சொல் பிரிப்புப் பதிவு

திணை – நெய்தல்

1

அரையுற்று அமைந்த ஆரம் நீவி,

புரையப் பூண்ட கோதை மார்பினை,

2

நல் அகம் வடுக் கொள முயங்கி, நீ வந்து,

எல்லினில் பெயர்தல் எனக்குமார் இனிதே.

3

பெருந் திரை முழக்கமொடு இயக்கு அவிந்திருந்த     5

கொண்டல் இரவின் இருங் கடல் மடுத்த

கொழு மீன் கொள்பவர் இருள் நீங்கு ஒண் சுடர்

ஓடாப் பூட்கை வேந்தன் பாசறை,

ஆடு இயல் யானை அணி முகத்து அசைத்த

ஓடை ஒண் சுடர் ஒப்பத் தோன்றும்  10

4

பாடுநர்த் தொடுத்த கை வண் கோமான்,

பரியுடை நல் தேர்ப் பெரியன், விரிஇணர்ப்

புன்னைஅம் கானல் புறந்தை முன்துறை

5

வம்ப நாரை இனன் ஒலித்தன்ன

அம்பல் வாய்த்த தெய்ய தண் புலர்        15

6

வைகுறு விடியல் போகிய எருமை

நெய்தல் அம் புது மலர் மாந்தும்

கைதை அம் படப்பை எம் அழுங்கல் ஊரே!

தோழி வரைவு கடாயது.

உலோச்சனார்

கி.மு. காலத்துப் பாடல்

ஆங்கில விளக்கம்

இரவில் விளக்குடன் மீன் பிடித்தல்