குளகம்

பல ஓடைகளிலிருந்து வரும் நீர் ஒரு குளத்தில் ஒன்றாகி நிற்பது போல, பல பாடல்கள் ஒரு முடிவினைக் கொண்டு ஒரு வாக்கியமாகத் திகழ்வது குளகம். 

'முன்புலகம் ஏழினையுந் தாயதுவு மூதுணர்வோர்

இன்புறக்கங் காநதியை யீன்றதுவும் - நன்பரதன்

கண்டிருப்ப வைகியதுங் கான்போ யதுமிரதம்

உண்டிருப்பா ருட்கொண் டதும் '

'வெந்த கரியதனை மீட்டுமக வாக்கியதும்

அந்தச் சிலையினைப்பெண் ணாக்கியதும் - செந்தமிழ்தேர்

நாவலன்பின் போந்ததுவும் நன்னீர்த் திருவரங்கக்

காவலவன் மாவலவன் கால்'

திருவரங்கக் காவலனும், பாரதப் போரில் தேரோட்டியவனுமாகிய திருமாலின் கால்கள் 

1

• மாவலியிடம் மூன்றடி மண் வேண்டிப் பெற்று உலகம் ஏழினையும் தாவி யளந்ததும் , 
• அருளுணர்ச்சி யுடையவர்கள் இன்புறுமாறு கங்கையை ஈன்றதுவும் , 
• நன்மைகள் அனைத்திற்கும் இருப்பிடமாகிய பரதன் நந்திக் கிராமத்தில் பதினான்கு ஆண்டுகள் வரை கண்டு இன்புறுமாறு வைகியதுவும் , 
• தந்தையின் ஏவவால் பதினான்கு ஆண்டுகள் காட்டிற்குச் சென்றுவந்ததுவும் , 
• அமிழ்தத்தை யுண்பவரான தேவர்கள் எப்பொழுதும் நினைந்து வணங்குதற்குரியதுவும் , 

2

• உபமந்நிய முனிவரின் மனைவி வயிற்றிலிருந்து சாபத்தால் பிறந்த கரிக்கட்டையை அச்சாபம் நீங்கப் பிள்ளையாய் உருக்கொள்ளுமாறு செய்ததுவும் , 
• கணவனின் சாபத்தால் கல்லாய்க் கிடந்த அகலிகையைச் சாபம் நீங்கப் பெண்ணாய் உருக்கொளச் செய்ததுவும் , 
• செந்தமிழை நன்கு கற்றுத் தேர்ந்த திருமழிசை யாழ்வாரின் பொருட்டுக் காஞ்சியை விட்டு அகன்றதுவும் 

ஆன சிறப்பினையுடையன.

 

முத்தகச் செய்யுள், குளகச் செய்யுள், தொகைநிலைச் செய்யுள், தொடர்நிலைச் செய்யுள் என்று செய்யுன் 4 வகை 

தண்டியலங்காரம் 

மேற்கோள் வெண்பா பதிவு - சொல் பிரிப்பு