திருக்குறள் அன்புடைமை TirukKural 71-80

அன்புடைமை

வித்துரை

1. அன்பு பாய்வதை அடைக்க முடியாது
2. அன்புடையார் அனைத்தும் தருவர்
3. அன்பு உயிரில் கலந்தது
4. அன்பு, ஆர்வம், நட்பு – தாத்தா, மகன், பிள்ளை
5. அன்பு தந்து இன்பம் பெறு
6. அன்பு துன்புறுத்தினாலும் அரவணைக்கும்
7. அன்பு உடலிலுள்ள எலும்பு போன்றது
8. அன்பில்லாதவர் பட்டுப்போன மரம்
9. அன்பு உடலுக்குள் இருக்கும் உறுப்பு போன்றது
10. அன்பினால் உயிர் தோன்றும்

தொகுப்புரை

அன்புடைமை

1. அன்பை அடைத்துவைக்கும் தாழ்ப்பாள் இல்லை. அன்புடையவரின் மென்மையான கண்ணீர் அவரது அன்பை வெளிப்படுத்திவிடும்.
2. அன்பு இல்லாதவர் அவருக்கு மட்டுமே உரியவர்; அன்புடையவர் தன் எலும்பையும் பிறருக்குப் பயன்படுமாறு செய்வர்.
3. அரிய உயிருக்கு அது இருக்கும் உடலிலிலுள்ள எலும்போடு என்ன தொடர்பு இருக்கிறதோ, அதே தொடர்புதான் அன்புக்கும் இருக்கிறது.
4. அன்பு ஆர்வம் என்னும் செல்வத்தைப் பெற்றெடுக்கும். அந்த ஆர்வச் செல்வம் தானே நாடிவரும் நட்பு என்னும் சிறப்பினைப் பெற்றெடுக்கும்.
5. உலகில் ஒருவர் இன்புறும் சிறப்பினைப் பெற்றிருக்கிறார் என்றால், அது அவர் காட்டும் அன்பினால் தானே வந்து அமர்ந்திருக்கும் பேறு.
6. அன்பு அறத்தைச் சார்ந்த ஒன்று கூறுவர். அறியாதவர் செய்யும் மறச் செயலுக்கு உதவுவதும் அதுதானே?
7. எலும்பு இல்லாத மண்புழுவை வெயில் காய்ச்சுவது போல, அன்பில்லா உயிரை அறம் காய்ச்சும்.
8. வறண்ட பாறை நிலத்தில் பால் வற்றிப்போன மரம் தளிர்க்குமா? அதுபோல அன்பு இல்லாத உயிரும் தழைக்க முடியாது.
9. உடலுக்குள் இருக்கும் மூளை முதலான அக உறுப்பு போன்றது அன்பு. அது இல்லாவிட்டால் கை, கால் போன்ற புற உறுப்புக்கள் எல்லாம் என்ன செய்ய முடியும்?
10. உயிரின் நிலைப்பாடு அன்பினைப் பின்தொடரும். அன்பு இல்லாவிட்டால் ஒருவனது உடல் அவனுக்கு இருப்பது எலும்பும் தோலும் போர்த்திய பிணம் போன்ற உடம்பு.

 

"அன்பின் வழியது உயிர்நிலை" எப்படி?

திருக்குறள்

அன்புடைமை

1. அன்பிற்கும் உண்டோ அடைக்குந்தாழ் ஆர்வலர் \ புன்கணீர் பூசல் தரும். 71
2. அன்பிலார் எல்லாம் தமக்குரியர் அன்புடையார் \ என்பும் உரியர் பிறர்க்கு. 71
3. அன்போடு இயைந்த வழக்கென்ப ஆருயிர்க்கு \ என்போடு இயைந்த தொடர்பு. 73
4. அன்புஈனும் ஆர்வம் உடைமை அதுஈனும் \ நண்பென்னும் நாடாச் சிறப்பு. 74
5. அன்புற்று அமர்ந்த வழக்கென்ப வையகத்து \ இன்புற்றார் எய்தும் சிறப்பு. 75
6. அறத்திற்கே அன்புசார் பென்ப அறியார் \ மறத்திற்கும் அஃதே துணை. 76
7. என்பி லதனை வெயில்போலக் காயுமே \ அன்பி லதனை அறம். 77
8. அன்பகத் தில்லா உயிர்வாழ்க்கை வன்பாற்கண் \ வற்றல் மரந்தளிர்த் தற்று. 78
9. புறத்துறுப் பெல்லாம் எவன்செய்யும் யாக்கை \ அகத்துறுப்பு அன்பி லவர்க்கு. 79
10. அன்பின் வழியது உயிர்நிலை அஃதிலார்க்கு \ என்புதோல் போர்த்த உடம்பு. 80