திருக்கை வழக்கம் TirukKai Valakkam

திருக்கை வழக்கம் பாடல் மூலம்

 

63 நாயன்மார்கள் சிலை 

கங்கை குலந்தழைக்கக் காட்டும் பெருங்கீர்த்தி

மங்கை பிரியாமல் வாழுங்கை – திங்களணி 1

எம்பிரான் எம்பெருமான் இந்திரா திபர்க்கரிய

தம்பிரா னுக்குரைத்த சந்தனக்கை – அம்பொன் 2

வளைவாரி வையகமும் வானகமும் போற்ற

முளைவாரி வந்த முழுக்கை – கிளைவாழக் 3

கச்சித் தலத்தானைக் கல்லால் எறியமறந்

தெச்சில் தயிர்ச்சோ(று) எறியுங்கை – பச்சைமிகு 4

தேமா வடுக்கமரிற் சிந்திற்றென் றேகழுத்தை

யாமா வெனவே அரியுங்கை – வாமமறை 5

ஓதுபுகழ் நாயனுடன் ஊரன் புறமென்றே

மோதுதடி கொண்டு முடுக்குங்கை – தீதகல 6

அஞ்செழுத்தே யொன்றாகி அப்பரெனத் தோன்றியரண்

செஞ்சரணத் தேபூசை செய்யுங்கை – வஞ்சியர்பால் 7

தூதரனைத் தான்விடுத்தசுந்தரனைக் காணாமல்

பேதமறத் தன்வயிறு பீறுங்கை – கோதகன்ற 8

சேர்ந்த மணவாசல் சிவனடியார்க் காமகடன்

கூந்தலரிந் தேமகிழ்ந்தே கொடுக்குங்கை – ஏந்தரிய 9

வட்டால் உறுபொருளால் வந்ததொண்டர்க் காமூர்க்கர்

தட்டா தமுதளிக்கும் தங்கக்கை – எட்டாது 10

போக்கு வரவற்ற பூரணனை நிந்திப்பார்

நாக்கை யரிந்துபுகழ் நாட்டுங்கை – ஆக்கையுறு 11

தாயிலார் தந்தையிலார் தம்மைமனத் துள்வைத்து

வாயிலார் பூசிக்கும் வாகுளகை – ஆய 12

வினையடு வாராகி விறல்கொள் பொருளை

முனையடுவார் நல்கிய முன்கை – வினையகல 13

அன்றுவரும் மாதவருக்(கு) ஆக்கியமாங் கனிகேட்க

ஒன்றவரு வித்தளித்தே ஓங்குங்கை – நின் றதுலாக் 14

கோலாலக் கோவணத்துக் கள்வர்தங் கோண்முழுதும்

ஆலாவ ளந்தறிந்த மாண்புளகை – யேலவார் 15

கூந்தலாள் தன்னைக் குலமறையோர்க் கீந்தொக்கல்

ஏந்துவா ளாலேவிண் ஏற்றுங்கை – சாந்தமுற 16

ஓதுபரனை உணர்த்துஞ் சிவாகமங்கள்

வேத புராணங்கள் விரிக்குங்கை – தீதில் 17

அருமறையைச் செந்தமிழால் அப்ப ரெனவந்து

திருமுறைக ளாச்சேர்க்குஞ் செங்கை – பெருமையுடன் 18

ஏதமில் வேதத்தை எடுத்தே சிவாலயத்துள்

ஓதுவா ராய்வந்தே ஓதுங்கை – காதலுடன் 19

வேதமொரு நான்கினையும் மிக்கதமிழ் நாலடியால்

ஓதியுரைத் தேயுலகில் ஒளிருங்கை – போதமுற 20

வேள்வியோ ரைந்தோடு வேளாளத் தோமமுமே

ஆள்வினை யாலெடுத் தாளுங்கை – நீணிலத்துள் 21

ஆன்படு நெய்விட் டளவிலா வாகுதியால்

வான்படச் சைவத்தீ வளர்க்குங்கை – மேம்படவே 22

கல்லார்கள் என்னாமற் கற்றோர்கள் என்னாமல்

எல்லாரை யுங்காத்தீ டேற்றுங்கை – வல்லமைசேர் 23

மைம்மா முகிலுலகை வாழ்விக்கு மேன்மைபோல்

கைம்மா றிலாதளிக்கும் கற்பகக்கை – சும்மையார் 24

ஊருணி நீர்போல் உலகத் தவர்க்கெல்லாம்

பேரறிவா லீயும் பிரதாபக்கை –பாரில் 25

உடுக்கை யிழந்தவன் கைபோல வாங்கே

கொடுக்க விசைந்த குளிர்க்கை – யிடுக்கணினான் 26

மாமறையோர் மன்னர் வருவினைஞர் சங்கரர்க்குந்

தாமலையா மற்கொடுத்துத் தாங்குங்கை – மாகளத்து 27

ஏற்கவந்த ஆதுலர்க்(கு) இல்லையென் னாதுநெல்லை

கார்க்கையினான் முக்கையிட்ட கற்பகக்கை – தீர்க்கமுடன் 28

செம்பொன் விளைகளத்தூர் செந்நெல் விளைந்ததனை

நம்பிமறை யோர்க்களித்த நாணயக்கை – அம்பொற் 29

பார்பூட்டு மன்னர் பரிகரிபூட் டக்கதிரோன்

தேர்பூட்ட ஏர்பூட்டும் செம்பொற்கை – வீரமதன் 30

ஐங்கோல் தொடுக்க அணைகோல் எடுக்கவுழும்

பைங்கொல் பிடிக்கும் பதுமக்கை – இங்கிதமாம் 31

சீர்படைத்த பூபாலர் செங்கோல் பிடிப்பதற்குப்

பேர்படைத்த மேழி பிடிக்குங்கை –கார்படைத்த 32

மிஞ்சுமதி கீர்த்தியைப்போன் மேதினியெல் லாந்தழைக்கச்

செஞ்சாலி நாற்றைத் தெளிக்குங்கை – எஞ்சாமல் 33

வெள்ளைக் களைகளைந்து வீறும் பயிர்தழைக்க

கள்ளக் களைகளைந்த கற்பகக்கை – வள்ளுறையும் 34

விற்போர் மதகரிப்போர் வெம்பரிப்போர் வெற்றிப்போர்

நெற்போர் முதற்போர் நெரித்திடுங்கை – பற்பலவாம் 35

காணி உழுதுண்டு கழிபொருளெல் லாங்கொண்டு

வாணிபங்கள் செய்தங்கு மாற்றுங்கை – மாணிவர்ந்த 36

ஐந்திணையின் பொருள்யாவும் அறத்தாலே தாம்தேடித்

தந்திணையில் வந்தணையத் தாங்குங்கை – முந்திப் 37

பிறர்பொருளுந் தம்பொருள்போற் பேணியேமூன் றாமெனவே

அறவளவை யாலளக்கும் அங்கை – திறமுடனே 38

ஊர்காக்கு மரக்சு(கு)உறுதியுழவாம் அதற்காய்

ஆள்காப்பே காப்பாக ஆளுங்கை – வான்சுவைபோல் 39

எண்ணை எழுத்தை இசையை இலக்கணத்தை

வண்மைபெற உண்டாக்கும் வாகுளகை – நுண்மையதாய் 40

மண்ணிற் கடலின் மலையிற் பெரியதென

எண்ணியெழு திக்கொண்டுத்த ஏற்றக்கை – திண்ணமதாய் 41

மானங் குலங்கல்வி வண்மை அறிவுடைமை  

தானந் தருமந் தழைக்குங்கை – ஈனமிலா 42

தொடையில் எழுஞ்சிலந்தித் தோற்றுவிக்கப் பட்டின்

புடவை கிழித்த பெருங்கை – துடவைதனில் 43

ஏரெழுப தோதியாங் கேற்றுங் களரியிலே

காரி விடநாகம் கடிக்குங்கை – பாரதனில் 44

நாவிற் புகழ்கம்ப நாடற் கடிமையென்றே

மாவைக் கரைத்துமுன்னே வைக்குங்கை – ஆவலுடன் 45

சங்கையிட்டுத் தள்ளாமல் தன்சோற்றை வந்தவற்குப்

பங்கையிட் டிரட்சித்த பங்கயக்கை – பொங்கமுடன் 46

பொன்னா லமுதும் பொறிக்கறியுந் தான்கொணர்ந்து

நன்னா வலர்க்களித்த நாணயக்கை – பன்னரிய 47

வையகமெங் குந்தேடி வந்ததமி ழோன்புகழச்

செய்யமுடி யைக்கொணுத்த செம்பொற்கை – துய்யபுகழ் 48

அன்றீந்த நாகெழுப தானவெரு மைத்திறத்தைக்

கன்றோடு நல்குங் கடகக்கை – வென்றிதரும் 49

ஓரானை நூறா யிரக்கலநெல் லோர்கவிக்குச்

சீராக நல்குந் தியாகக்கை – நேரா 50

எறும்புக்கும் ஆஸ்ப்பதந்தான் இல்லையென்ற மட்டில்

திறம்புக்க யானைதருஞ் செங்கை – யரும்புதனில் 51

எண்ணா யிரமுனிவர்க்(கு) ஏற்றபடி அப்படியே

பண்ணா கக்கொடுக்கும் பராக்கிரமக்கை –விண்ணாடர் 52

மூக்கிற் புகைபுரிந்த மூதாவின் வாயிடத்து

நீக்கியபை நாக்கதனில் நீட்டுங்கை – ஊக்கமுடன் 53

பாவல னெச்சில் படுமாங் கனியெடுத்து

ஆவலுடன் நன்றாய் அருந்துங்கை – தாவரிய 54

வண்டமிழோன் தானுதைத்த வாகுளகா லுக்குப்பொன்

வெண்டாயமிட் டேவணங்கும் வெற்றிக்கை – புண்டரிகக் 55

கையாற் புலவன் கனகமுடி மேற்குட்டச்

செய்யாழி பண்ணியிட்ட தீரக்கை – பையவே 56

மிக்கபுல வனுக்காக வேசிமனை மட்டாகத்

தக்கசிவி கைக்கணை தாங்குங்கை – ஒக்குமென 57

ஏதமற்ற கீர்த்தியைக்கொண்  டேட்டகத்தி லேயடிமைச்

சாதனமிட் டேகொடுத்த தங்கக்கை  - மேதினியிற் 58

சூலி முதுகிற் சுடச்சுடவப் போதுசமை

பாலடிசில் தன்னைப் படைக்குங்கை – சாலவே 59

நாணந் தராமல் நடுங்காமல் கூசாமல்

பாணன் பிணத்தைப் பரிக்குங்கை – காணவே 60

தண்டமிழோன் தன்மனத்திற் சந்தேகந் தீரக்கூழ்

உண்டவயிற் றைப்பீறி யூற்றுங்கை – கண்டளவில் 61

வன்னி யிடைமூழ்கி வானோர் பழிகழுவிக்

கன்னிதனை யேமணந்த காட்சிக்கை – துன்னுமொரு 62

பேருலகை யெல்லாம் பிழைப்பிக்கும் ஓர்கொழுவின்

கூரிலொரு வன்கழுத்தைக் குத்துங்கை – பாரறிய 63

திருப்பருத்திக் குன்றிற் சிவனால யங்கள்பல

விருப்புடனே கட்டி வீறுங்கை – பருப்பதம்போல் 64

அட்டதிக்கும் எண்கீர்த்தி ஆயிரத்தெட் டானைதனை

வெட்டிப் பரணிகொண்ட வீரக்கை – திட்டமுடன் 65

கூர்த்த புகழண்ட கோளமட் டும்படர

நாற்றிக்கு மேருவினி நாட்டுங்கை – ஆர்த்தபுகழ் 66

மேழிக் கொடிசிங்க வெற்றிக் கொடிகுயிலின்

வாழிக் கொடியே மருவுங்கை – நீளுலகில் 67

சாற்றுமொட்டக் கூத்தன் சரசகவி சொல்லப்பால்

ஆற்றுநீர் கொணர்ந்த ஆண்மைக்கை – நேர்த்திபெற 68

விளைபயி ரைப்பார்த்து விரைக்கால் புலத்தை

வளைய மதிலிட்டு வருங்கை – தளையவரும் 69

நீலி தனக்கஞ்சி நின்றவணி கேசனுக்காக்

கோலி யபயங் கொடுக்குங்கை – மேலச்சம் 70

வீறுபெரும் பறையன் வீயாம லோர்கலத்தில்

சோறு பிசைந்துண்ட சுடர்மணிக்கை – பேறுறும் 71

பேர்காக்க இந்திரற்காப் பேசுபிணை என்றிறைமுன்

கார்காக்கும் ஒப்பில் கமலக்கை – தீர்வில் 72

மனக்கவலை யுற்றவணி கன்முன் னேனின்று

தனைக்கா வெனக்கேட்ட தற்கை – வனக்குன்றின் 73

மங்கையொரு பாகற்கும் மன்னவர்க்கும் மாதவர்க்கும்

துங்கமணி முடியைச் சூட்டுங்கை – அங்கன் 74

தலாபாரந் தாங்கும் தனியரசும் பொன்னும்

துலாபாரந் தட்டினில் தூக்குங்கை – இலாபமுறும் 75

பண்டுமுடி நாவிதனால் பற்றற்பாற் றன்றென்றே

கொண்டைகட்டிக் கொண்டாளுங் கோமளக்கை – பண்டையதாம் 76

எட்டாருந் தொண்டைநாட்(டு) எழுபத்தொன் பானாகும்

நாட்டாரென் றேபுகழை நாட்டுங்கை – வாட்டமிலா 77

ஆர்த்த குடிமக்கள் அறுமூவர்க் காம்வழக்கைத்

தீர்த்தெழுதி ஒட்டகத்திற் சேர்க்குங்கை – சீர்த்த 78

தொகாநாட் டார்கூடித் துரைக்கெழுது மேட்டில்

மகாநாட்டா ரென்றுவைக்கும் வண்கை – சுகமயமாய் 79

உள்ளங் குழைந்தாய் உழவாற் பெருக்கவிதை

பிள்ளையெனக் கேயுதவப் பேணுங்கை – வள்ளல் 80

கதமிறொண்டக் காவலன் காமுறு மக்கட்குள்

முதலியெனப் பேர்படைத்த முன்கை – சிதமாய் 81

உசாவு கடல்கடைய வோடதி யீந்து

தசாங்க மிறைநல்கத் தாங்குங்கை – நிசாங்கமதாய் 82

சங்கருகு தீவட்டிச் சாமரைப தாகைகுடை

பொங்குதொண்டன் நல்கப் புரக்குங்கை – கங்குல்பகல் 83

நடக்க யிருக்கை நகைக்கை மிடிதீர்க்கை

கொடுக்கை செழுங்கை குளிர்க்கை – தொடுத்ததெல்லாஞ் 84

சீராக வுண்டாக்குஞ் செங்கைப் பெருங்கருணைக்

காராளர் கறிபகப்பூங் கை 85

திருக்கை வழக்கம் முற்றும்