Showing posts with label பரிபாடல். Show all posts
Showing posts with label பரிபாடல். Show all posts

Tuesday, 9 August 2016

பரிபாடல் திரட்டு Paripadal Annex 13

எது இனிது? வையைப் புனலில் நீராடுவதா? திருப்பரங்குன்றத்தை வழிபட்டுச் சுவைத்தலா? வேலின் நுனி போல் பாயும் கண்ணை உடைய இவளோடு நான் எதனைச் செய்து இன்புறுவேன்? இப்படி ஒருவனை மருளவைப்பது இந்த இடலகளுக்கு இயல்பு.

பாடல்சொல் பிரிப்புப் பதிவு

'வையை வருபுனல் ஆடல் இனிதுகொல்?
செவ் வேள் கோ குன்றம் நுகர்தல் இனிதுகொல்?
வை வேல் நுதி அன்ன கண்ணார் துணையாக
எவ்வாறு செய்வாம்கொல், யாம்?' என, நாளும்,
வழி மயக் குற்று மருடல் நெடியான் 5
நெடு மாடக் கூடற்கு இயல்பு.

இப் பகுதி தொல்காப்பியம் மெய்ப்பாட்டியல் 11 ஆம் சூத்திர உரையில் இளம் பூரணரால் காட்டப்பெற்றுள்ளது. இது பரிபாடலைச் சார்ந்ததாகலாம் என ஆராய்ச்சியாளர்கள் ஊகிக்கின்றனர்.
காலம்கி. பி. மூன்றாம் நூற்றாண்டுக்கு முன்

பரிபாடல் திரட்டு Paripadal Annex 12

கொடை வழங்குபவர்களை உலகம் கொண்டாடும். கொடையை ஏற்பவர்களைக் கண்டு வழங்குவோர் மகிழ்வர். இந்த இரண்டும் மதுரையிலும் திருப்பரங்குன்றத்து முருகன் கோயிலிலும் நிகழும். இந்த இரண்டு இடங்களிலும் வாழ்வோரே வாழ்வார் எனப்படுவார். மற்றையாரில் தேவர் உலகம் செல்வார் யார்?

பாடல்சொல் பிரிப்புப் பதிவு

ஈவாரைக் கொண்டாடி, ஏற்பாரைப் பார்த்து உவக்கும்
சேய் மாடக் கூடலும், செவ்வேள் பரங்குன்றும்,
வாழ்வாரே வாழ்வார் எனப்படுவார்; மற்றையார்
போவார் ஆர், புத்தேள் உலகு

புறத்திரட்டில் நகர் என்னும் பகுதியில் உள்ளது
காலம்கி. பி. மூன்றாம் நூற்றாண்டுக்கு முன்

பரிபாடல் திரட்டு Paripadal Annex 11

கார்த்திகைப் பெண் காதில் இருக்கும் பொன்னாலான மகரக் குண்டலம் போல மதுரையின் புகழ் செல்வத்தோடு கோத்துக் கிடக்கும். கொடித்தேர்ப் பாண்டியன் சொல்லிப் பாராட்டும் அளவுக்குக் கோத்துப் பூத்துக் கிடக்கும்.

பாடல்சொல் பிரிப்புப் பதிவு

கார்த்திகை காதில் கன மகர குண்டலம்போல்,
சீர்த்து விளங்கித் திருப் பூத்தல் அல்லது,
கோத்தை உண்டாமோ மதுரை, கொடித் தேரான்
வார்த்தை உண்டாகும் அளவு

புறத்திரட்டில் நகர் என்னும் பகுதியில் உள்ளது
காலம்கி. பி. மூன்றாம் நூற்றாண்டுக்கு முன்

பரிபாடல் திரட்டு Paripadal Annex 10

திருமகள் நெற்றியில் திலகம்
திருமகளுக்கு இட்ட திலகம் போல் உலகுக்குத் திலகமாக விளங்கிப் புகழ் பூத்துக் கிடப்பது மதுரை. இந்தப் புகழ் வையைக்கு உண்டாகும் புகழ் அளவு பூத்துக் கிடக்கும்.

பாடல்சொல் பிரிப்புப் பதிவு

செய்யாட்கு இழைத்த திலகம்போல், சீர்க்கு ஒப்ப,
வையம் விளங்கிப் புகழ் பூத்தல் அல்லது,
பொய்யாதல் உண்டோ மதுரை புனை தேரான்
வையை உண்டாகும் அளவு

புறத்திரட்டில் நகர் என்னும் பகுதியில் உள்ளது
காலம்கி. பி. மூன்றாம் நூற்றாண்டுக்கு முன்

பரிபாடல் திரட்டு Paripadal Annex 9

மதுரையின் புகழ் தமிழ் நாட்டகப் பரப்பெல்லாம் பூத்துக் கிடக்கிறது. அந்தப் புகழ் குன்றுவது உண்டோ? இல்லை. கொடித்தேரான் பாண்டியன் குன்றம் பொதியமலை போல புகழ் வளர்ந்துகொண்டே இருக்கும்.

பாடல்சொல் பிரிப்புப் பதிவு

தண் தமிழ் வேலித் தமிழ்நாட்டகம் எல்லாம்
நின்று நிலைஇப் புகழ் பூத்தல் அல்லது,
குன்றுதல் உண்டோ மதுரை, கொடித் தேரான்
குன்றம் உண்டாகும் அளவு

புறத்திரட்டில் நகர் என்னும் பகுதியில் உள்ளது
காலம்கி. பி. மூன்றாம் நூற்றாண்டுக்கு முன்

பரிபாடல் திரட்டு Paripadal Annex 8

கூடல் எனப்பட்ட மதுரையின் சிறப்பினைக் கூறுவது இந்தப் பாடல்.
சிறப்பு மிக்க மதுரை என்னும் ஊர் திருமால் வயிற்றில் இருக்கும் கொப்பூழ்த் தாமரை போன்றது. அந்தப் பூவின் இதழ்கள் போன்றவை அதன் தெருக்கள். இதழின் நடுவே இருக்கும் பொகுட்டு போன்றது சொக்கநாதர் கோயில். பூவிலிருக்கும் மகரந்தத் தாது போன்றவர் அங்கு வாழும் தமிழ்க்குடி மக்கள். இவ்வூருக்கு வந்து பரிசில் பெற்றுச் செல்பவர்கள் தாமரையில் தேன் உண்ணும் பறவைகள் போன்றவர்கள். பூவில் பிறந்தவன் பிரமன். பிரமன் நாவில் பிறந்தவை நான்மறை வேதங்கள். இந்த வேதம் ஓதும் ஒலியைக் கேட்டு மதுரை மக்கள் துயில் எழுவர். சேலன் வஞ்சியும், சோழன் கோழியும் (உறையூரும்) போல கோழி கூவித் துயிலெழ மாட்டார்கள்.

பாடல்சொல் பிரிப்புப் பதிவு
 
திருமால், கொப்பூழ், தாமரை, பிரமன் 
மாயோன் கொப்பூழ் மலர்ந்த தாமரைப்
பூவொடு புரையும், சீர் ஊர்; பூவின்
இதழகத்து அனைய தெருவம்; இதழகத்து
அரும் பொகுட்டு அனைத்தே, அண்ணல் கோயில்;
தாதின் அனையர், தண் தமிழ்க் குடிகள்;           5
தாது உண் பறவை அனையர், பரிசில் வாழ்நர்;
பூவினுள் பிறந்தோன் நாவினுள் பிறந்த
நான்மறைக் கேள்வி நவில் குரல் எடுப்ப
ஏம இன் துயில் எழுதல் அல்லதை,
வாழிய வஞ்சியும் கோழியும் போலக்     10
கோழியின் எழாது, எம் பேர் ஊர் துயிலே.

புறத்திரட்டில் நகர் என்னும் பகுதியில் உள்ளது
காலம்கி. பி. மூன்றாம் நூற்றாண்டுக்கு முன்

பரிபாடல் திரட்டு Paripadal Annex 7

புலவர்கள் தம் அறிவு என்னும் தராசுக் கோலில் வைத்து நிறுத்துப் பார்த்தனர். உலகம் முழுவதையும் ஒரு தட்டிலும் தென்னவனின் நான்மாடக் கூடலை மற்றொரு தட்டிலும் வைத்து நிறுத்தனர். உலகம் வைத்த தட்டு வாடிப்போய் மேலே போய்விட்டது. கூடல் நகரம் இருந்த தட்டு பெருமையால் உயர்ந்து தாழ்ந்து நின்றது. – இவ்வாறு கூடல் நகரின் பெருமை இதில் பேசப்படுகிறது.

பாடல்சொல் பிரிப்புப் பதிவு

உலகம் ஒரு நிறையாத் தான் ஓர் நிறையாப்
புலவர் புலக் கோலால் தூக்க, - உலகு அனைத்தும்
தான் வாட, வாடாத தன்மைத்தே தென்னவன்
நான்மாடக் கூடல் நகர்.

புறத்திரட்டில் நகர் என்னும் பகுதியில் உள்ளது

காலம்கி. பி. மூன்றாம் நூற்றாண்டுக்கு முன்

பரிபாடல் திரட்டு Paripadal Annex 6

ஐம்புலனும் முன்பு துய்த்து அறியாத உடல் புணர்ச்சிதான் முதல்புணர்ச்சி. வண்டு மொய்க்கும் கூந்தலை உடைய பெண்ணை இப்படி முதல்புணர்ச்சியில் துய்த்து இன்புறுவது இயல்அணி. வன்பணி என்பது அவளை வற்புறுத்திப் பெறுவது. நாணம் என்னும் தொன்மையான அணிகலன் பூண்ட பெண்ணாகிய நன்னுதலை வன்பணியால் கொள்ளல் ஆகாது.

பாடல்சொல் பிரிப்புப் பதிவு

முன்பு உற்று அறியா முதல் புணர்ச்சி மொய் குழலை
இன்பு உற்று அணிந்த இயல் அணியும் வன் பணியும்
நாண் எனும் தொல்லை அணி என்ன நல்நுதலை ... ... ... னந்து

இப் பகுதி நாற்கவிராச நம்பியகப்பொருள் சூ. 129, உரையில் உள்ளது.
               
காலம்கி. பி. மூன்றாம் நூற்றாண்டுக்கு முன்

பரிபாடல் திரட்டு Paripadal Annex 5

இந்தப் பாடல் பகுதி பரத்தை ஒருத்தியின் மனப்பாங்கைக் கூறுகிறது.
முழவு ஈரமாக்கி முழக்கப்படும். இப்படி முழவு முழங்க ஒருத்தி திருமணம் செய்துகொண்ட தோளாயிற்றே இவன் தோள் என்று எண்ணிப் பார்க்காமல் அவன் மேல் ஆசை கொள்ளும் கட்டழகிதான் பரத்தை. அவளைக் காண்பவன் ஒருவனுக்கு மட்டும் அவள் தன் நெஞ்சைத் தந்து நின்றுவிடுவதில்லை. புதியவனை அவள் நெஞ்சு நாடிக்கொண்டே இருக்கும்.

பாடல்சொல் பிரிப்புப் பதிவு

மண் ஆர்ந்து இசைக்கும் முழவொடு கொண்ட தோள்
கண்ணாது உடன் வீழும் காரிகை! கண்டோர்க்குத்
தம்மொடு நிற்குமோ, நெஞ்சு?

இப் பகுதி தொல்காப்பியம் செய்யுள் இயல், சூ. 120, பேராசிரியர், நச்சினார்க் கினியர் உரைகளில் உள்ளது.
               
காலம்கி. பி. மூன்றாம் நூற்றாண்டுக்கு முன்

Monday, 8 August 2016

பரிபாடல் திரட்டு Paripadal Annex 4

தமிழ் தெரிவு செய்யப்பட்ட மொழி அமைதி கொண்டது; மாட்சிமை பொருந்தியது; முத்தமிழ் என அமைந்துள்ளது. தென்னம் பொருப்பு என்னும் பொதியமலையின் தலைவன் பாண்டியன் போற்றுவது. அவன் குதிரைப்படை போல வையையில் புனல் பரந்து பாய்கிறது.

பாடல்சொல் பிரிப்புப் பதிவு
4. வையை

தெரிமாண் தமிழ் மும்மைத் தென்னம் பொருப்பன்
பரிமா நிரையின் பரந்தன்று வையை.

இப் பகுதி திருக்குறள் (23) பரிமேலழகர் உரையைப் பற்றிய 'நுண் பொருள் மாலை' யால் தெரிய வருகின்றது.
மேற்கோள் | தொல்காப்பியம் செய்யுளியல் சூத்திம் 121 பேராசிரியர் உரை, நச்சினார்கினியார் உரை                            
காலம்கி. பி. மூன்றாம் நூற்றாண்டுக்கு முன்

பரிபாடல் திரட்டு Paripadal Annex 3

அரிய மறைவேதங்களைக் காப்பதற்கு அறவோர் உள்ளனர். பகைவர்கள் விரும்பாமல் நாங்கள் விரும்பும் நன்னெறி புகட்டும் வையைப் புனலோடு எங்களுக்கு உள்ள நட்பு மீண்டும் அமையவேண்டும் என்று மக்கள் வேண்டுகின்றனர்.

முனைவர் பாண்டியன் தரும் ஆங்கில மொழியாக்கம்
பாடல்சொல் பிரிப்புப் பதிவு
3. வையை

அறவோர் உள்ளார் அரு மறை காப்ப,
...
செறுநர் விழையாச் செறிந்த நம் கேண்மை
மறு முறையானும் இயைக! நெறி மாண்ட
தண் வரல் வையை எமக்கு.        5

இப் பகுதி தொல்காப்பியம் செய்யுள் இயல், சூ. 121, பேராசிரியர், நச்சினார்க் கினியர் உரைகளில் கண்டது. இப் பகுதி 'அறவோர் உள்ளார்' என்று தொடங்கும் பரிபாடலின் இறுதி என்று தெரிய வருகின்றது.
               
காலம்கி. பி. மூன்றாம் நூற்றாண்டுக்கு முன்

பரிபாடல் திரட்டு Paripadal Annex 2

பித்தை
தலை ஒப்பனை
பாண்டியன் மக்களோடு சேர்ந்து வையைப் புனலில் ஆடினான்.
1
நிலம் தெரியாமல் இருண்டு மழை பொழிந்த காலத்தில் நாக மலர்களை அடித்துக்கொண்டு வையை வெள்ளம் மதுரைக்கு வந்தது.
2
நீர் அழகைக் காண விரும்பி, மாலை அணிந்துகொண்டு, மகிழ்ச்சியுடன் மக்கள் ஒன்று திரண்டனர். ஒருவரை ஒருவர் முண்டிக்கொண்டு நின்றனர். வையைக் கரையில் கடைத்தெருக்களும் அமைக்கப்பட்டன.
3
கையில் மாலையும் கண்ணியும் வைத்திருந்தனர். மணப்புகையும் புத்தாடைகளும் வைத்திருந்தனர். மகளிர் விரித்த கூந்தலாகவும், பித்தைக்கொண்டை போட்டும் ஒப்பனை செய்துகொண்டிருந்தனர். தளிர் போன்ற இவர்கள் யானைமேல் சென்றனர். குதிரை, வண்டி, தேர் ஆகியவற்றிலும் சென்றனர். நெருக்கமாச் சென்றனர். வண்டிக்கு மூடாக்குப் போட்டுக்கொண்டு சென்றனர். ஊடலும், ஊடல் தணித்தலும், தணிதலும் நிகழ்ந்தன. ஆடல், பாடல், ஆர்த்தல், சிரித்தல், சிரித்துக்கொண்டே ஓடுதல், ஓடித் தளர்தல், உற்றாரைக் கூட்டத்தில் தேடுதல் என்று பல்வகைக் களியாட்டங்கள் நிகழ்ந்தன. ஊர் மெச்சத் திரிபவர் யாரும் இல்லை. கற்றார், கல்லாதவர், கயவர், மக்களைப் பெற்றவர்கள்,, பெறாதவர்கள், அனைவரும் சென்றனர். கூடல் நகர அரசன் தேரில் சென்றான்.
4
காதலர் தோளைத் தெப்பமாக்கிக்கொண்டு ஏறி ஆடினர். சிலர் மறைவிடம் சென்று ஆடினர். சிலர் அவர்களை எங்கே என்று தேடினர். துறையில் இவ்வாறு மாறுபட்ட நிகழ்ச்சசிகளும் நடைபெற்றன. இவ்வாறு வையைத் துறை அகன்று கிடந்தது. ஒருவன் அணிந்திருந்த மாலை ஒருத்தியின் தலையில் இருந்தது. அதனைக் கொடுத்துவிடு என்றாள் அவன் மனைவி. இது அவனே எனக்குப் போட்டது தரமாட்டேன் என்றாள் அவள். அவன் நான் தரவில்லை என்றான். அப்படியென்றால் தண்ணீர் அடித்துக்கொண்டு வந்து என் தலையில் ஏறிவிட்டதா என்று அவள் வினவினாள். மனைவியும் காமக் கிழத்தியும் இவ்வாறு சண்டையிட்டுக்கொண்டனர். பின்னர் ஒருவாறு உணர்ந்து “நீயும் இவனுக்குத் துணைவி” என்று மனைவி கூறி அமைதியுற்றாள்.
5
உயர்ந்த சிறப்பினை உடைய இந்தக் கூடல் நகரம் பஞ்சவன் எனப் போற்றப்பபடும் பாண்டியனுக்கு உரியது. இந்தக் கூடலில் பாயும் வையைப் புனலில் மணி போல் ஒளிறும் அழகும், மா நிற மேனியும், முறுவலிக்கும் முத்துப் பற்களும், பவளம் போன்ற வாயையும் கொண்டு கற்புஅறத்தைக் கடைப்பிடிக்கும் பெண்கள் தம் தாலிமணி அணிந்த உரிமை மைந்தரோடு விளையாட விளையாடத் தணியாத இன்பம் தருவது வையைப் புனல்.
6
ஏதோ ஒரு ஆணின் பூமாலையோடு யாரோ ஒரு பெண்ணின் பூமாலை சேர்ந்தடித்துச் செல்வதைப் பார்த்தால் கணவனுக்கு உரிமைக்காரி ஊடல் கொள்ளமாட்டாளா?
7
ஈ பாயும் நறாக்கள் கலந்து பாய்கிறது என்று பார்ப்பார் இதில் நீராடவில்லை. மைந்தர், மகளிர் மணத்துகள்கள் கலந்து வருகிறது என்று அந்தணர் நீரைத் தொடவில்லை. நீரில் தேன் கலந்து வருவதால் வழுவழுப்பாக இருக்கிறது என்று ஐயர் வையை நீரில் வாய் கொப்பளிக்கவில்லை.
8
(இது அராகம் என்னும் முடுகியல் பகுதி) விரைவால் நுரை கலந்து பாய்கிறது. கடலிலும், கரையிலும், மதகிலும், நுரை புகுமளவுக்கு வையைப் புனல் பாய்கிறது.
9
இயல்தேர்ப் பொருப்பன் பண்டியனின் ’திருமருத முன்துறை’ (மருதத்துறை = மதுரை) இது. மலை போன்ற யானை மேல் மகளிரும் சேர்ந்து அமர்ந்துகொண்டு இங்குச் செல்வர். யாழில் மருதப்பண் பாடுவர். பாடிப் பாடி, ஆடி ஆடி, ஊடி ஊடி, கூடிக் கூடி, தேடித் தேடி, அடிபட்டு அடிபட்டு, சூடிச் சூடி, தொழுது தொழுது, மகளிரோடு மைந்தர் சேர்ந்து நீராடினர். குணக்குன்றச் சான்றவர்கள் உண்டு மகிழ்ந்தனர்.
10
சந்தனம், தார்மாலை. கோதை, சுண்ணப்பொடி, கூந்தலில் நழுவிய பூ முதலானவை மிதப்பபதால் நீரே தெரியவில்லை. மழைநீர் வற்றும் குளத்தில் நிற்கும் கலங்கல் நீர் போல நிற்காமல் கலவை நீர் ஓடிக்கொண்டே இருந்தது.
11
அரசன் மாறன் யானைமேல் வந்து மதுரை மக்களோடு சேர்ந்து நீராடுவதானது, ஆயிரம் கண் படைத்த இந்திரன் கங்கை வானாற்றில் நீராடுவது போல் இருந்தது.

பாடல்சொல் பிரிப்புப் பதிவு
2. வையை
1
மா நிலம் தோன்றாமை மலி பெயல் தலைஇ,
ஏம நீர் எழில் வானம் இகுத்தரும் பொழுதினான்,
நாக நீள் மணி வரை நறு மலர் பல விரைஇ,
காமரு வையை கடுகின்றே, கூடல்.
2
'நீர் அணி கொண்டன்று வையை' என விரும்பி,        5
தார் அணி கொண்ட உவகை தலைக்கூடி,
ஊர் அணி கோலம் ஒருவர் ஒருவரின்
சேர் அணி கொண்டு, நிறம் ஒன்று வெவ்வேறு
நீர் அணி கொண்ட நிறை அணி அங்காடி,
ஏர் அணி கொண்டார், இயல்.       10
3
கை புனை தாரினர், கண்ணியர்,
எனும் ஆவியர், ஆடையர்,
நெய் அணி கூந்தலர், பித்தையர்,
மெய் அணி யானை மிசையராய், ஒய்யெனத்
தங்காச் சிறப்பின் தளிர் இயலார் செல்ல;       15
பொங்கு புரவிப்புடைப் போவோரும், பொங்கு சீர்
வையமும் தேரும் அமைப்போரும்; எவ் வாயும்
பொய்யாம் போய் என்னாப் புடை கூட்டிப் போவநர்
மெய்யாப்பு மெய் ஆர மூடுவார்; வையத்துக்கு
ஊடுவார்; ஊடல் ஒழிப்பார்; உணர்குவார்:       20
ஆடுவார், பாடுவார்; ஆர்ப்பார், நகுவார்; நக்கு
ஓடுவார்; ஓடித் தளர்வார்; போய், உற்றவரைத்
தேடுவார்; ஊர்க்குத் திரிவார் இலராகி-
கற்றாரும், கல்லாதவரும், கயவரும்,
பெற்றாரும், பெற்றாற் பிழையாத பெண்டிரும்,        25
பொற்றேரான் தானும், பொலம் புரிசைக் கூடலும்,
முற்றின்று-வையைத் துறை.
4
துறை ஆடும் காதலர் தோள் புணையாக,
மறை ஆடுவாரை அறியார் மயங்கி,
பிறை ஏர் நுதலியர் எல்லாரும் தம் முன்   30
நிகழும் நிகழ்ச்சி எம்பால் என்று, ஆங்கே,
இகல் பல செல்வம் விளைத்தவட் கண்டு, இப்பால்,
அகல் அல்கும் வையைத் துறை.
காதலான் மார்பின் கமழ் தார், புனல் வாங்கி,
ஏதிலாள் கூந்தலிடைக் கண்டு, 'மற்று அது 35
தா தா' என்றாளுக்கு, 'தானே புறன் தந்து
வேய்தந்தது'. 'என்னை? விளைந்தமை மற்று அது
நோதலே செய்யேன், நுணங்கு இழையாய்! இச் செவ்வி
போதல் உண்டாம்கொல்? அறிந்து புனல் புணர்த்தது!
ஓஒ! பெரிதும் வியப்பு.      40
கயத் தக்க பூப் பெய்த காமக் கிழமை
நயத் தகு நல்லாளைக் கூடுமா கூடும்
முயக்குக்கு, செவ்வி முலையும் முயக்கத்து
நீரும் அவட்குத் துணை; கண்ணின் நீர் விட்டோய்!
நீயும் அவட்குத் துணை.  45
5
பணிவு இல் உயர் சிறப்பின் பஞ்சவன் கூடல்,
மணி எழில், மா மேனி, முத்த முறுவல்,
அணி பவளச் செவ் வாய், அறம் காவற் பெண்டிர்
மணி அணிந்த தம் உரிமை மைந்தரோடு ஆடித்
தணிவின்று, வையைப் புனல். 50
6
'புனலூடு போவது ஓர் பூ மாலை கொண்டை,
எனலூழ் வகை எய்திற்று' என்று ஏற்றுக்கொண்ட
புனலூடு நாடு அறியப் பூ மாலை அப்பி,
நினைவாரை நெஞ்சு இடுக்கண் செய்யும் கனல்புடன்,
கூடாமுன், ஊடல் கொடிய திறம் கூடினால்,               55
ஊடாளோ? ஊர்த்து அலர் வந்து ஊர்ந்து.
என ஆங்கு-
7
'ஈப் பாய் அடு நறாக் கொண்டது, இவ் யாறு' எனப்
பார்ப்பார் ஒழிந்தார், படிவு.
'மைந்தர் மகளிர் மண விரை தூவிற்று' என்று,          60
அந்தணர் தோயலர், ஆறு.
'வையை தேம் மேவ வழுவழுப்பு உற்றென'
ஐயர், வாய்பூசுறார், ஆறு.
8
விரைபு இரை விரை நுரை கரை அழிபு இழிபு ஊர ஊர்தரும் புனல்,
கரையொடு கடலிடை வரையொடு கடலிடை நிரைநிரை நீர் தரு நுரை,           65
நுரையுடன் மதகுதொறு இழிதரு புனல் கரை புரளிய செலும்மறி கடல்,
புகும் அளவுஅளவு இயல் இசை சிறை தணிவின்று,வெள்ள மிகை.
9
வரை பல புரை உயர் கயிறு அணி பயில் தொழில்
மணி அணி யானைமிசை, மைந்தரும் மடவாரும்,
நிரைநிரை குழீஇயினர் உடன் சென்று,              70
குரு மணி யானை இயல் தேர்ப் பொருநன்
திருமருத முன்துறை முற்றம் குறுகி,
தெரி மருதம் பாடுப, பிணி கொள் யாழ்ப் பாணர்.
பாடிப் பாடி, பாய்புனல்
ஆடி ஆடி, அருளியவர்  75
ஊடி ஊடி, உணர்த்தப் புகன்று
கூடிக் கூடி, மகிழ்பு மகிழ்பு,
தேடித் தேடி, சிதைபு சிதைபு,
சூடிச் சூடி, தொழுது தொழுது,
மழுபொடு நின்ற மலி புனல் வையை     80
விழு தகை நல்லாரும் மைந்தரும் ஆடி,
இமிழ்வது போன்றது, இந் நீர்-குணக்குச் சான்றீர்!
முழுவதும் மிச்சிலா உண்டு.
10
சாந்தும், கமழ் தாரும், கோதையும், சுண்ணமும்,
கூந்தலும் பித்தையும் சோர்ந்தன   85
பூவினும், அல்லால், சிறிதானும் நீர் நிறம்
தான் தோன்றாது-இவ் வையை ஆறு.
மழை நீர் அறு குளத்து வாய்பூசி ஆடும்
கழு நீர மஞ்சனக் குங்குமக் கலங்கல்
வழி நீர்; விழு நீர அன்று-வையை.         90
11
வெரு வரு கொல் யானை வீங்கு தோள் மாறன்,
உரு கெழு கூடலவரோடு, வையை
வரு புனல் ஆடிய தன்மை பொருவுங்கால்-
இரு முந்நீர் வையம் படித்து என்னை? யான் ஊர்க்கு
ஒரு நிலையும் ஆற்ற இயையா! அரு மரபின்,           95
அந்தர வான் யாற்று, ஆயிரம் கண்ணினான்
இந்திரன் ஆடும் தகைத்து.


இப் பாடல், தொல்காப்பியம், செய்யுள் இயல், சூ. 118 இளம்பூரணர் உரையில் கண்டது.
காலம்கி. பி. மூன்றாம் நூற்றாண்டுக்கு முன்

Blog Archive


எழுத்துப் பிழை திருத்தி

சந்திப் பிழை திருத்தி

தமிழ் வலைப்பதிவு திரட்டி