Showing posts with label ஐந்திணை70. Show all posts
Showing posts with label ஐந்திணை70. Show all posts

Saturday, 11 February 2017

ஐந்திணை எழுபது சேர்க்கை Aintinai Elubadu annexure

முடமுதிர் புன்னைப் படுகோட் டிருந்த
மடமுடை நாரைக்கு உரைத்தேன் - கடனறிந்து
பாய்திரைச் சேர்ப்பன் பரித்தேர் வரக்கண்டு
நீதகா தென்று நிறுத்து.
நூலைச் சேர்ந்ததாக ஊகிக்கும்பாடல்

முடம் முதிர் புன்னைப் படுகோட்டு இருந்த மடமுடை நாரைக்கு உரைத்தேன் கடன் அறிந்து பாய்திரைச் சேர்ப்பன் பரித் தேர் வர, கண்டு, 'நீ தகாது' என்று நிறுத்து.

முதிர்ந்து முடம் பட்டு வளைந்திருக்கும் புன்னைமரக் கிளையில் அமர்ந்திருக்கும் நாரையிடம் நான் சொன்னேன். பாயும் அலை வந்தேறும் சேர்ப்பு நிலத் தலைவன் என் காதலன். அவன் தேரில் வந்து என்னிடம் இருந்துவிட்டுச் சென்றுவிடுகிறான். மணந்துகொள்ளவில்லை. ஆதலால் அவனது தேர் வரக்கண்டால், அதனை நிறுத்தி ‘நீ செய்வது தகாது’ என்று சொல்லிவிடு, என்று சொல்லியிருக்கிறேன்.
தலைவி தோழியிடம் சொல்கிறாள்.

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 68 Aintinai Elubadu 68

சிறுமீன் கவுள்கொண்ட செந்தூவி நாராய்
இறுமென் குரலநின் பிள்ளைகட்கே ஆகி
நெறிநீர் இருங்கழிச் சேர்ப்பன் அகன்ற
நெறியறிதி மீன்தபு நீ. --- 68

சிறு மீன் கவுள் கொண்ட செந் தூவி நாராய் இறு மென் குரல நின் பிள்ளைகட்கே ஆகி, நெறி நீர் இருங் கழிச் சேர்ப்பன் அகன்ற நெறி அறிதி, மீன் தபு நீ.

நாரையே! சிவப்பு இறகுகளை உடைய நாரையே, வன்மையான குரல் கொண்ட நாரையே, உன் பிள்ளைகளுக்கு ஊட்டுவதற்காகச் சிறிய மீனைக் கடைவாயில் வைத்துக்கொண்டிருக்கும் நாரையே, நீதான் சொல்லவேண்டும். நெளியும் நீர் கொண்ட கழி சேர்ந்த சேர்ப்புநிலத் தலைவனாகிய என் காதலன் சென்ற வழி உனக்குத்தான் தெரியும். எனக்குச் சொல்லிவிடு.
காமம் மிக்க கழிபடர் கிளவி.
நாரை விடு தூது.

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 67 Aintinai Elubadu 67

இவர்திரை நீக்கியிட் டெக்கர் மணல்மேல்
கவர்கால் அலவன் தனபெடையோடு
தவழும் இருங்கழிச் சேர்ப்ப என்தோழி
படர்பசலை பாயின்று தோள். --- 67

இவர் திரை நீக்கியிட்டு, எக்கர் மணல்மேல் கவர் கால் அலவன் தன பெடையோடு, தவழும் இருங் கழிச் சேர்ப்ப! என் தோழி படர் பசலை பாயின்று தோள்.

சேர்ப்ப, கேள். அலை வந்தேறும் மணல் பகுதியை ஒதுக்கிவிட்டு நண்டானது மேடிட்டுக் கிடக்கும் மணல்மேல் ஆண்நண்டு தன் பெண்நண்டுகளோடு தவழும் கழிநிலச் சேர்ப்பின் தலைவனே, கேள். என் தலைவியின் தோள் பசலை பாய்ந்து கிடக்கிறது. நீ அவளை மணந்துகொண்டு அவளைத் தழுவி அந்தப் பசலையைப் போக்கும்படி வேண்டுகிறேன்.
தோழி தலைவிக்காகத் தலைவனை வேண்டுகிறாள்.

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 66 Aintinai Elubadu 66

நுண்ஞாண் வலையின் பரதவர் போத்தந்த
பன்மீன் உணங்கல் கவரும் துறைவனைக்
கண்ணினால் காண அமையும்கொல் என்றோழி
வண்ணந்தா என்கம் தொடுத்து. --- 66

நுண் ஞாண் வலையின் பரதவர் போத்தந்த பல் மீன் உணங்கல் கவரும் துறைவனைக் கண்ணினால் காண அமையும்கொல் என் தோழி வண்ணம் தா என்கம் தொடுத்து.

என் தோழியே, கேள். நுண்ணிய கயிற்றாலான வலையைப் பயன்படுத்திப் பரதவர் கடலில் பிடித்துவந்த பல்வகையான மீன்கள் காயும்போது பறவைகள் கவர்ந்துசெல்லும் துறையின் தலைவன் என் காதலன். அவனைக் கண்ணால் கண்டாலே போதும் போல் இருக்கிறது. கண்டால் என் அழகைத் திரும்பத் தந்துவிடு என்று கேட்கலாம் அல்லவா?
தலைவி தோழியிடம் முறையிடுகிறாள்.

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 65 Aintinai Elubadu 65

எறிசுறாக் குப்பை இனங்கலக்கத் தாக்கும்
எறிதிரைச் சேர்ப்பன் கொடுமை அறியாகொல்
கானகம் நண்ணி அருளற் றிடக்கண்டும்
கானலுள் வாழும் குருகு --- 65

எறி சுறாக் குப்பை இனம் கலக்கத் தாக்கும் எறி திரைச் சேர்ப்பன் கொடுமை அறியாகொல் கானகம் நண்ணி அருள் அற்றிடக் கண்டும், கானலுள் வாழும் குருகு?

அவன் சேர்ப்பன். கடலில் மிதவைகளில் செல்வோரை சுறாமீன் குடும்பக் கூட்டம் எறிந்து தாக்கும் சேர்ப்பு நிலத்தின் தலைவன் அவன். கானல் மலர்ச்சோலையில் என்னைத் தழுவிய அவன் இப்போதெல்லாம் வராமல் அருள் அற்றவனாக எனக்குக் கொடுமை செய்கிறான். இந்தக் கானலில் குருகுப் பறவைகள் வாழ்கின்றன. சேர்ப்பன் அருள் அற்றவனாக இருப்பது கண்டும் குருகுப் பறவைகள் வாழ்கின்றன. குருகுப்பறவை போல் நான் வாழ்கிறேன்.
தலைவியின் தவிப்பு.
திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 64 Aintinai Elubadu 64


தெண்ணீர் இருங்கழி வேண்டும் இரைமாந்தி
பெண்ணைமேல் சேக்கும் வணர்வாய்ப் புணரன்றில்
தண்ணம் துறைவற் குரையாய் மடமொழி
வண்ணந்தா என்று தொடுத்து. --- 64

தெண் நீர் இருங் கழி, வேண்டும் இரை மாந்தி, பெண்ணைமேல் சேக்கும் வணர் வாய்ப் புணர் அன்றில்! தண்ணம் துறைவற்கு உரையாய், ‘மடமொழி வண்ணம் தாஎன்று தொடுத்து.

அன்றில் பறவையே! தெளிந்த நீரை உடைய கழியில் விரும்பும் இரையை உண்ட பின்னர் பனை மரத்தில் தன் துணையுடன் சேர்ந்திருக்கும் அன்றில் பறவையே! என் காதலன் தண்ணந் துறைவனிடம் சென்று தூது சொல். உன்னை நினைத்து உன்னவள் வாடி அழகிழந்து கிடக்கிறாள். அவள் அழகைத் திருப்பித் தந்துவிடு என்று திரும்பத் திரும்பச் சொல். மணந்துகொள் என்று சொல்.
தலைவி அன்றிலைத் தூது விடுகிறாள்.

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 63 Aintinai Elubadu 63

கண்ணறு நெய்தல் கமழும் கொடுங்கழித்
தண்ணம் துறைவனோ தன்னிலன் ஆயிழாய்
வண்ணகைப் பட்டதனை ஆண்மை எனக் கருதி
பண்ணமைத் தேர்மேல் வரும். --- 63

கள் நறு நெய்தல் கமழும் கொடுங் கழித் தண்ணம் துறைவனோ தன் இலன்; ஆயிழாய்! வள் நகைப்பட்டதனை ஆண்மை எனக் கருதி, பண் அமைத் தேர்மேல் வரும்.

அவன் துறைவன். தேன் மணம் கமழும் நெய்தல் பூத்துத் ‘தண்’ என்னும் துறை அவன் துறை. அந்தத் துறைவன் தன் நிலையில் நில்லாதவன். உணர்ச்சி வயப்பட்டு என்னுடன் உறவாடுபவன். ஆய்தெடுத்த அணிகலன் பூண்டவளே! அவன் எனக்கு வழங்கிய கொடையால் ஊரார் சிரிப்பதைத் ’தன் ஆண்மை’ என்று என்று எண்ணிக்கொண்டு மீண்டும் மீண்டும் தன் தேரில் ஏறிப் பெருமை தோன்ற என்னிடம் வருகிறான்.
தலைவி தோழியிடம் சொல்கிறாள்.

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 62 Aintinai Elubadu 62

அடும்பிவர் எக்கர் அலவன் வழங்கும்
கொடுங்கழிச் சேர்ப்பன் அருளான் எனத்தெளிந்து
கள்ள மனத்தான் அயனெறிச் செல்லும்கொல்
நல்வளை சோர நடந்து --- 62

அடும்பு இவர் எக்கர் அலவன் வழங்கும் கொடுங் கழிச் சேர்ப்பன் அருளான் எனத் தெளிந்து கள்ள மனத்தான் அயல் நெறிச் செல்லும்கொல் நல் வளை சோர, நடந்து?

அவன் சேர்ப்பன். அடுப்பங்கொடி ஏறிப் படரும் மணலில் நண்டு நடந்து செல்லும் சேர்ப்புநிலத் தலைவன் அவன். அவன் நமக்கு அருள் செய்யமாட்டான் என்று தெளிந்த என் வளையல் “அவன் தன் கள்ள மனத்தால் வேறொருத்தியை நாடி அயல்நெறியில் செல்லுவானோ” என்று என் கையிலிருந்து நழுவுகின்றன.
தலைவி தோழியிடம் கூறுகிறாள்.

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 61 Aintinai Elubadu 61

கண்டிரள் முத்தம் பயக்கும் இருமுந்நீர்ப்
பண்டம்கொள் நாவாய் வழங்கும் துறைவனை
முண்டகக் கானலுள் கண்டேன் எனத்தெளிந்தேன்,
நின்ற உணர்விலா தேன். --- 61

கண் திரள் முத்தம் பயக்கும் இரு முந்நீர்ப் பண்டம் கொள் நாவாய் வழங்கும் துறைவனை முண்டகக் கானலுள் கண்டேன் எனத் தெளிந்தேன், நின்ற உணர்வு இலாதேன்.

கண்ணைக் கவரும் முத்தைப் பெற்றுத் தரும் கடலில் வாணிகப் பண்டங்களை நாவாய் கொண்டுவரும் கடல் துறைமுகத்தின் தலைவன் என் காதலன். முண்டகப் பூ மலர்ந்திருக்கும் கானலில் அவனைக் கண்டு தெளிவடைந்தேன். அதனால் என் உணர்வை நான் இழந்துவிட்டேன்.
தலைவி தன் தோழியிடம் கூறுகிறாள்.

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 60 Aintinai Elubadu 60

மணிநிற நெய்தல் இருங்கழிச் சேர்ப்பன்
அணிநலம் உண்டகன்றான் என்கொல் எம்போல்
தணிமணல் எக்கர்மேல் ஓதம் பெயர
துணிமுந்நீர் துஞ்சா தது --- 60

மணி நிற நெய்தல் இருங் கழிச் சேர்ப்பன் அணி நலம் உண்டு அகன்றான்; என்கொல், எம்போல் தணி மணல் எக்கர்மேல் ஓதம் பெயர, துணி முந்நீர் துஞ்சாதது?

அவன் சேர்ப்பன். நீல நிற நெய்தல் மலர் அகன்ற கழியில் பூக்கும் சேர்ப்புநிலத் தலைவன். அவன் என் அழகு நலம் எல்லாவற்றையும் உண்டு அகன்று சென்றான். அதனால் நான் அவனை நினைத்துத் தூங்காமல் இருக்கிறேன். இது சரி. ஆனால் இந்தக் கடலில் அலையும் தூங்காமல் இருக்கிறதே! மணலின்மேல் ஏறி இறங்குகிறதே!
தலைவி தோழியை வினவுகிறாள்.
கேட்கும் தலைவன் திருமணம் செய்கொள்ள வேண்டும் என்பது கருத்து.
 
மணி நிற நெய்தல்
திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 59 Aintinai Elubadu 59

இடுமணல் எக்கர் அகன்கானல் சேர்ப்பன்
கடுமான் மணியரவம் என்று - கொடுங்குழை
புள்ளரவம் கேட்டுப் பெயர்ந்தாள் சிறுகுடியர்
உள்ளரவம் நாணுவர் என்று. --- 59

இடு மணல் எக்கர் அகன் கானல் சேர்ப்பன் கடு மான் மணி அரவம் என்று, கொடுங்குழை புள் அரவம் கேட்டுப் பெயர்ந்தாள் சிறு குடியர் உள் அரவம் நாணுவர் என்று.

அது காற்று இட்ட மணல் மேடிட்டிருக்கும் கானல் நிலம். காதலன் ஏறி வரும் குதிரையின் மணியோசை கேட்கிறது என்று எண்ணிக்கொண்டு அவள் வந்தாள். அவள் காதில் வளைந்த குழை அணிந்தவள். வந்து பார்த்த பின்னர் அது பறவையின் ஒலி என்று தெரிந்தபின் திரும்பிப் போய்விட்டாள். அவள் வாழும் சிறுகுடியில் உள்ளவர்கள் இவளை அலர் தூற்றி நாணுவர் என்று நினைத்து, கானலில் காத்திருக்காமல் திரும்பிவிட்டாள்.
தோழி தலைவனிடம் இவ்வாறு சொல்கிறாள்.

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 58 Aintinai Elubadu 58

என்னைகொல் தோழி அவர்கண்ணும் நன்கில்லை
அன்னை முகனும் அதுவாகும் பொன்னலர்
புன்னையம் பூங்கானற் சேர்ப்பனைத் தக்கதேர்
நின்னல்ல தில்லென் றுரை. --- 58

என்னைகொல் தோழி அவர்கண்ணும் நன்கு இல்லை அன்னை முகனும் அது ஆகும்; பொன் அலர் புன்னை அம் பூங் கானற் சேர்ப்பனை, ‘தக்க தேர் நின் அல்லது இல்என்று உரை.

தோழி! இங்கு என்ன நடக்கிறது? அவரிடத்திலும் நற்செயல் இல்லை. அன்னையும் என்னை அவ்வாறே நடத்தி முகம் காட்டுகிறாள். அவன் பொன் போல் பூக்கும் புன்னைமரம் மிக்க கானல்நிலச் சேர்ப்பன். அவனிடம் சொல்லு. “உன்னைத் தவிர வேறு துணை இல்லை” என்று நான் சொன்னதாகச் சொல்.
தலைவி தோழியிடம் சொல்கிறாள்.

புன்னை

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 57 Aintinai Elubadu 57

ஒழுகு திரைக்கரை வான்குருகின் தூவி
உழிதரும் ஊதை எடுக்கும் துறைவனைப்
பேதையான் என்றுணரும், நெஞ்சம் இனிதுண்மை
ஊதியம் அன்றோ உயிர்க்கு --- 57

ஒழுகு திரைக் கரை வான் குருகின் தூவி உழிதரும் ஊதை எடுக்கும் துறைவனைப் பேதையான் என்று உணரும், நெஞ்சம்; இனிது உண்மை ஊதியம் அன்றோ உயிர்க்கு?

அவன் துறைவன். அலை ஏறி இறங்கும் கரையில் வானில் பறக்கும் குருகின் தூவி விழுந்து கிடக்கும். அதனை அடிக்கும் ஊதைக்காற்று பறக்க வைக்கும். இப்படிப்பட்ட துறை அவன் துறை. இந்தத் துறைவனைப் பேதையான் (கள்ளம் கபடமற்றவன்) என்று உணர்தல் என் உயிருக்குக் கிடைத்துள்ள ஊதியம். இது இனிக்கும் உண்மை.
தலைவி தோழியிடம் சொல்கிறாள்.

திணை - நெய்தல்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


Friday, 10 February 2017

ஐந்திணை எழுபது 56 Aintinai Elubadu 56

வளவயல் ஊரன் மருளுரைக்கு மாதர்
வளைஇய சக்கரத் தாழி கொளைபிழையா
தொன்றிடை இட்டு வருமேனின் வாழ்நாட்கள்
ஒன்றி அனைத்தும் உளேன். --- 56

வள வயல் ஊரன் மருள் உரைக்கு மாதர் வளைஇய சக்கரத்து ஆழி, கொளை பிழையாது, ஒன்று இடைஇட்டு வருமேல், நின் வாழ் நாட்கள் ஒன்றி அனைத்தும் உளேன்.

வளவயல் ஊர, மகளிர் உள்ளம் மயங்கும்படி நீ பேசுவாய். ஊர, நீ வளைத்துச் சுழற்றி விடும் சொல்-சக்கரம் மகளிரைக் குறி தவறாமல் தாக்கும். அந்தச் சக்கரம் ஒன்றை இடையிலே விட்டுவிட்டு நீ வந்தால் (பரத்தையரை முற்றிலுமாக விட்டுவிட்டு வந்தால்) உன் வாழ்நாள் முழுவதும் உன்னோடு ஒன்றி வாழ்வேன்.
பரத்தையிடமிருந்து வந்த கணவனிடம் மனைவி கூறுகிறாள்.

திணை - மருதம்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


ஐந்திணை எழுபது 55 Aintinai Elubadu 55

பொய்கைநல் ஊரன் திறம்கிளத்தல் என்னுடைய
எவ்வம் எனினும் எழுந்தீக வைகல்
மறுவில் பொலந்தொடி வீசும் அலற்றும்
சிறுவன் உடையேன் துணை --- 55

பொய்கை நல் ஊரன் திறம் கிளத்தல்! என்னுடைய எவ்வம் எனினும், எழுந்தீக; வைகல் மறு இல் பொலந் தொடி வீசும், அலற்றும், சிறுவன் உடையேன் துணை.

என் கணவன் நல்ல பொய்கைகள் நிறைந்த ஊரை உடையவன். அவனது திறப்பாடுகளைச் சொல்வதால் என்னுடைய துன்பந்தான் பெருகும். எழுந்து போய்விடுங்கள். என் மகன் நாள்தோறும் தன் கையிலுள்ள பொன் வளையல்களைக் கழற்றி வீசுகிறான். நாள்தோறும் அப்பா அப்பா என்று அலறுகிறான். அவன் துணை எனக்கு இருக்கிறது. அது போதும் என் கணவனுக்காகப் பரிந்துரைக்க வந்தவர்களே எழுந்து போய்விடுங்கள்.
தலைவி கூறுகிறாள்.

திணை - மருதம்
மூவாதியார் இயற்றிய ஐந்திணை எழுபது
சங்கம் மருவிய காலம் – கி. பி. 3 ஆம் நூற்றாண்டு


Blog Archive


எழுத்துப் பிழை திருத்தி

சந்திப் பிழை திருத்தி

தமிழ் வலைப்பதிவு திரட்டி