Friday, 28 July 2017

பழமொழி 368 PalaMoli 368

உமியைக் குற்றிக் கை வருந்துதல்
நெல்லைக் குற்றினால் அரிசி குடைக்கும்
அரிசி இல்லாத உமியைக் குற்றினால்?
 
368.

தமக்குற்ற தேயாகத் தம்மடைந்தார்க் குற்றது
எமக்குற்ற தென்றுணரா விட்டக்கால் என்னாம்
இமைத்தருவி பொன்வரன்றும் ஈர்ங்குன்ற நாட
உமிக்குற்றுக் கைவருந்து மாறு.
 
தமக்கு உற்றதே ஆகத் தம் அடைந்தார்க்கு உற்றது எமக்கு உற்றது என்று உணரா விட்டக்கால், என் ஆம்? இமைத்து அருவி பொன் வரன்றும் ஈர்ங் குன்ற நாட! உமிக் குற்றுக் கை வருந்துமாறு.

ஒன்றன் தாக்கம் தமக்கு உற்றது போலவே தம்மை அடைந்திருப்பவருக்கும் இருக்கும் என உணரவேண்டும். 
அவருக்கு நேர்ந்த துன்பம் தனக்கு நேர்ந்தது போலக் கொள்ளாவிட்டால் என்ன பயன். 
கண்ணைப் பறிக்கும் பொன்னைக் கொட்டிக்கொண்டு அருவி கொட்டும் ஈரமான குன்றநாட்டு வேந்தனே,
உமியைக் குற்றினால் கைதானே வலிக்கும்? 
தன்னை வந்தடைந்தவர் அரிசி இல்லாத நெல் போன்ற உமி அல்லர். 

முன்றுறை அரையனார் இயற்றிய பழமொழி (பழமொழி நானூறு)
பழமைப் பேச்சு

No comments:

Post a Comment

Blog Archive


எழுத்துப் பிழை திருத்தி

சந்திப் பிழை திருத்தி

தமிழ் வலைப்பதிவு திரட்டி