Saturday, 13 February 2016

பதிற்றுப்பத்து PatitrupPattu 29

வயலோர வீடு. வாழை மரத்துக்குப் பக்கத்தில் உரல். புது நெல்லைப் போட்டு மகளிர் வளையல் குலுங்க அவல் இடித்துக்கொண்டிருப்பர். வளைந்த கதிர் விட்டு நெல் விளைந்திருக்கும். அந்த வயல்நீரில் மேயும் கொழுத்த அயிரை மீன்களை மேய்வதற்காக நாரைப் பறவைகள் வரும். அங்குள்ள மரங்களில் அமர்ந்து மீனைக் கொத்தவும், நெல்லங்கதிர்களைக் கவரவும் காத்திருக்கும். மகளிர் தம் உலக்கையை வாழைமரத்தில் சேர்த்துச் சாய்த்து வைத்துவிட்டு தம் வறுங்கைகளை (வெண்கை, ஒன்றுமில்லாத வெள்ளைக்கை) வீசி வெண்ணிறக் குருகிகளை ஓட்டுவர்.
ஊர் அழியா விழாக் கோலத்துடன் திகழும். வயிரியர் முதலில் மன்றத்தில் இசைப்பர். பின் தெருவெங்கிலும் பாடிக்கொண்டு செல்வர். இப்படிப்பட்ட அகன்ற நிலப்பரப்பினைக் கொண்டது அந்த நாடு. எப்போது?
குட்டுவன் ஆகும் எல்லை தெரியாத பெரிய பெரிய பல யானைகளைக் கொண்ட படையை உடையவன். அவன் தினையும் (கூலம்) பலி தந்த குருதியும் கலந்து சிதறி வழிபாடு செய்த பின் போர்முரசை முழக்குவான். அது மயிர் நீக்காத தோலால் போர்த்தப்பட்டது. அதன் முழக்கத்துடன் குட்டுவன் தன் யானைப் படையை போரில் நடத்தியதற்கு முன்பு அவன் பகைநாடு வளத்துடன் திகழ்ந்தது.
அவல் எறி உலக்கை
அவல் இடிக்கும் உலக்கை

பாடல் சொல்-பிரிப்புப் பதிவு
பாடல் 29

அவல் எறி உலக்கை வாழைச் சேர்த்தி,
வளைக் கை மகளிர் வள்ளை கொய்யும்,
முடந்தை நெல்லின் விளைவயல் பரந்த
தடந் தாள் நாரை இரிய; அயிரைக்
கொழு மீன் ஆர்கைய மரம்தொறும் குழாஅலின்,   5
வெண் கை மகளிர் வெண் குருகு ஓப்பும்,
அழியா விழவின், இழியாத் திவவின்,
வயிரிய மாக்கள் பண் அமைத்து எழீஇ,
மன்றம் நண்ணி, மறுகு சிறை பாடும்
அகன் கண் வைப்பின் நாடு  மன் அளிய!          10
விரவு வேறு கூலமொடு குருதி வேட்ட
மயிர் புதை மாக் கண் கடிய கழற,
அமர் கோள் நேர் இகந்து, ஆர் எயில் கடக்கும்
பெரும் பல் யானைக் குட்டுவன்
ஆவரம்பு இல் தானை பரவா ஊங்கே. 15

துறை:வஞ்சித்துறைப் பாடாண் பாட்டு
வண்ணமும் தூக்கும்:அது
பெயர்: வெண் கை மகளிர்             

பல் யானைச் செல்கெழு குட்டுவனைப்
பாலைக் கௌதமனார் பாடய பாடல்கள் 10. அவற்றில் ஒன்று இது.           
கி.மு. காலத்துப் பாடல்


No comments:

Post a Comment

Blog Archive


எழுத்துப் பிழை திருத்தி

சந்திப் பிழை திருத்தி

தமிழ் வலைப்பதிவு திரட்டி