Tuesday, 8 December 2015

தை மாசி பங்குனி மாதம் | காளமேகப்புலவர் KalamekapPulavar

தை மாசி பங்குனி மாதம் என்னும் சொற்களை பிரிமொழிகளாக்கி, வாழ்க்கையின் நிகழ்வுப் பொருள்களில் வரும்படி அமைத்துக் காளமேகப் புலவர் பாடிய வெண்பா.
அம் < ஓம் மந்திரம்

பாடல்

பாணர்க்குச் சொல்லுவதும் பைம்புனலை மூடுவதும்
தாணு வுரித்ததுவுஞ் சக்கரத்தோன்ஊணதுவும்
எம்மானை யேத்துவது மீசனிடத் துஞ்சிரத்தும்
தைமாசி பங்குனிமா தம் (40)

தை மாசி பங்குனி மாது அம்
  • பாணர்க்குச் சொல்லுவது தை - பாணர்கள் ஆணும் பெண்ணுமாகச் சேர்ந்து ஆடுவர். அவர்கள் கால் தப்படி வைப்பதற்காகச் சொல்லப்படுவது ’தை தக்க தை’
  • பைம்புனலை மூடுவது மாசி - மாசி மாதம் காலை வேளையில் தண்ணீரை மூடிக்கொண்டிருப்பது குருட்டுமாசி என்னும் வெண்மேகம்.
  • தாணு உரித்தது பங்கு – தாணு என்பது மூங்கில். மூங்கிலில் கூடை பின்னுவோர் மூங்கிலைச் சிம்பு சிம்புகளாகச் சீவுவர். அது மூங்கிலின் பங்கு.  
  • சக்கரத்தோன் ஊண் அது உனி – உனி என்பது வெண்ணெய். சக்கரத்தோன் என்பவன் கண்ணன். அவன் உணவு வெண்ணெயாகிய உனி.
  • எம்மானை ஏத்துவது அம்  - அம் என்பது ‘அம்’ என்னும் மந்திரம். அம் என்னும் தமிழ் மந்திரத்தை ஓம் (அ+இ+உ=ஓ) என்று வடமொழி ஒலிக்கிறது. எம்மான் = எம் பெருமானாகிய தெய்வம். எம் பெருமானைப் போற்றும் மூல-மந்திரம் ‘அம்’.  
  • ஈசன் இடத்தும், சிரத்தும், மாது – ஈசனின் இடப்பாகத்தில் இருப்பது உமை மாது. சிரமாகிய தலையில் இருப்பது கங்கை மாது.
    மூங்கில் கூடை பின்னுதல் 



No comments:

Post a Comment

Blog Archive


எழுத்துப் பிழை திருத்தி

சந்திப் பிழை திருத்தி

தமிழ் வலைப்பதிவு திரட்டி