Saturday, 30 May 2015

புறநானூறு 344

இக்காலக் கைவரிமேடு | கணியம்
இக்காலக் கால்வரிமேடு | கணியம்
இக்காலக் கைவரி | கணியம்
இவளை அடைய விரும்புபவர், ஒன்று விழுப்பொருள் தருதல் வேண்டும். அல்லது பகைமை கொண்டு ஊரை எரியூட்டும் பண்பில்லாத ஆண்மையை மேற்கொள்ள வேண்டும். இரண்டில் ஒன்று செய்தாகவேண்டும்.
இவளது அல்குல் வரிகளைக் கணித்த கணிப்பெருமாட்டி (கணிமேவந்தவள்) இப்படித்தான் சொல்கிறாள். இந்தக் கணிமேவந்தவள் பனித்துளி படிந்த காஞ்சி மலர்களை அணிந்திருந்தாளாம்.  
எந்த அளவு பொருள் தரவேண்டும் என்பதற்கு ஒரு விளக்கம் தரப்படுகிறது.
  • மயில் பசுமையான தோகை உடையது.
  • அது செந்நெல் விளைந்திருக்கும் வயலில் நெல்லைத் தின்னும்.
  • கையில் வளையல் அணிந்த மகளிர் அதனை ஓட்டுவர்.
  • அது பறந்து சென்று நீர்த்துறையின் ஓரமாக உள்ள மருதமரத்தில் ஏறிக்கொள்ளும்.
இப்படிப்பட்ட நீர்த்துறையும் நெல்வயலும் கொண்ட ஊரையே, அவ்வூரில் உள்ள விழுமிய பொருள்கள் அனைத்தையுமே அவளுக்குப் பரிச விலையாகத் தருதல் வேண்டுமாம்.  

பாடல் (சொற்பிரிப்புப் பதிவு)

செந்நெல் உண்ட பைந் தோட்டு மஞ்ஞை,
செறி வளை மகளிர் ஓப்பலின், பறந்து எழுந்து,
துறை நணி மருதத்து இறுக்கும் ஊரொடு,
நிறைசால் விழுப் பொருள் தருதல் ஒன்றோ
புகை படு கூர் எரி பரப்பிப் பகை செய்து,         5
பண்பு இல் ஆண்மை தருதல் ஒன்றோ
இரண்டினுள் ஒன்று ஆகாமையோ அரிதே,
காஞ்சிப் பனிமுறி ஆரங் கண்ணி..................
கணி மேவந்தவள் அல்குல் அவ் வரியே.

திணை காஞ்சி; துறை மகட்பாற் காஞ்சி.
...............அடைநெடுங் கல்வியார் பாடியது.
புலவர் பெயருக்கு முன்னால் சிதைவு உள்ளது. அடுத்தப் பாடலில் இந்தப் பகுதியில் "அவனை அவர் பாடியது" என்னும் மாட்டு-உத்தி கையாளப்பட்டுள்ளது. எனவே சிதைந்த பகுதியில் ஒரு மன்னன் பெயர் இருந்திருக்கவேண்டும் எனத் தெரிகிறது.  
காலம் : கி.மு. இரண்டாம் நூற்றாண்டு



No comments:

Post a Comment

Blog Archive


எழுத்துப் பிழை திருத்தி

சந்திப் பிழை திருத்தி

தமிழ் வலைப்பதிவு திரட்டி