Tuesday, 24 March 2015

புறநானூறு 230

ஆனிரைகள் மேச்சல் நிலங்களிலேயே
தங்கும் அளவுக்கு
விலங்கு பகை கடிந்தவன் அரசன் எழினி
செங்கோல் ஆட்சியிலும், வாட்போரிலும் பொய்மை சேராமல் செயலாற்றிய எழினி தகடூர்ப் போரில் களத்திலேயே மாண்டான்.
இவனது ஆட்சியில் ஆடுமாடுகள் தம் கன்றுகளுடன் மேயும் காட்டிலேயே தங்கும்படியாகவும்,
வெளியிடங்களுக்குச் செல்லும் புதியவர்கள் விரும்பிய இடங்களில் தங்கும்படியாகவும்,
காட்டு விலங்குகளின் பகைமையைப் போக்கிக் காவல் காத்துச் எங்கோல் ஆட்சி புரிந்தவன் இந்த எழினி.
இந்தக் காவலுக்காக இவன் பயன்படுத்திய வாளாண்மையை உலகமே புகழ்ந்தது.
இவன் மாண்டதனால்
இவனது சுற்றத்தார் தாயை இழந்த பச்சைக்குழந்தை போல ஆங்காங்கே வருந்தினர்.
பசியால் வாடும் உடல் போல உலகமே துன்ப நெஞ்சத்தோடு கலங்கியது.
அறம் இல்லாத ஏ, கூற்றமே!
இந்த உலகைக் காட்டிலும் நீ பெரிதும் வருந்துகிறாய்.
விதைத்துண்டு வாழும் வளத்தை அறியாத உழவன் தான் வீழும் காலத்தில் தன்னிடமுள்ள விதையை உணவாக்கிக்கொண்டது போல இவன் உயிரை நீ உணவாக்கிக்கொண்டுவிட்டாய். இவ்வாறு இவனை உணவாக்கிக்கொள்ளாவிட்டால் இவன் போரிடும் களத்தில் பல உயிர்களை வயிறார நீ பருகலாம் அன்றோ?

பாடல் (சொற்பிரிப்புப் பதிவு)

கன்று அமர் ஆயம் கானத்து அல்கவும்,
வெங் கால் வம்பலர் வேண்டு புலத்து உறையவும்,
களம் மலி குப்பை காப்பு இல வைகவும்,
விலங்கு பகை கடிந்த கலங்காச் செங்கோல்,   
வையகம் புகழ்ந்த வயங்கு வினை ஒள் வாள்,  5
பொய்யா எழினி பொருது களம் சேர
ஈன்றோள் நீத்த குழவி போல,
தன் அமர் சுற்றம் தலைத்தலை இனைய,
கடும் பசி கலக்கிய இடும்பை கூர் நெஞ்சமொடு
நோய் உழந்து வைகிய உலகினும், மிக நனி        10
நீ இழந்தனையே, அறன் இல் கூற்றம்!
வாழ்தலின் வரூஉம் வயல் வளன் அறியான்,
வீழ் குடி உழவன் வித்து உண்டாஅங்கு
ஒருவன் ஆர் உயிர் உண்ணாய் ஆயின்,
நேரார் பல் உயிர் பருகி,           15
ஆர்குவை மன்னோ, அவன் அமர் அடு களத்தே.

திணை பொதுவியல்; துறை கையறு நிலை.
அதியமான் தகடூர் பொருது வீழ்ந்த எழினியை
அரிசில் கிழார் பாடியது.

காலம் : கி.மு. மூன்றாம் நூற்றாண்டு முதல் கி.பி. இரண்டாம் நூற்றாண்டு


No comments:

Post a Comment

Blog Archive


இந்தக் கருவிகளைப் பயன்படுத்தி உங்கள் கட்டுரையில் பிழையைத் திருத்திக்கொள்ளலாம்.