Thursday, 4 December 2014

நெடுநல்வாடை - பொருள் கண்ணோட்டம்

பத்துப்பாட்டு நூல்களில் ஒன்றாகத் திகழும் இந்த நூல் தலையாலங்கானத்துச் செரு வென்ற பாண்டியன் நெடுஞ்செழியன் மீது பாடப்பட்ட நூல் என அதன் கொளுக்குறிப்பு தெரிவிக்கிறது, இந்த வகையில் இது புறப்பொருள் பற்றிய நூல். நூலைப் படிப்பவர்களுக்கு இது முல்லைத்திணையின் உரிப்பொருளான ‘இருத்தல்’ பொருள் பற்றிய நூலாகவே திகழ்கிறது.

‘நெடுநல்வாடை’ என்னும் இந்த நூல் ‘முல்லைப்பாட்டு’ நூலைப் போலவே தலைவன் பிரிவை ஆற்றிக்கொண்டு இருக்கும் தலைவி பற்றிக் கூறும், முல்லைத்திணையின் கருப்பொருளாகிய ‘இருத்தல்’ பொருள் விளக்கமாகத் திகழும் அகப்பொருள் நூல். எனினும் இது வரலாற்று நோக்கில் பாண்டியன் நெடுஞ்செழியன் மீது பாடப்பட்டதாகக் குறிக்கப்பட்டுள்ளது. பாடலில் இதற்கான சான்று ஒன்றும் இல்லை. “வேம்பு தலை யாத்த நோன் காழ் எஃகம்” (176), “வேந்தன்” (186) என்னும் குறிப்புகள் நெடுஞ்செழியனைக் குறிப்பதாக எடுத்துக்கொண்டவர்கள் இந்தப் பாடலைப் புறப்பொருள்-பாடல் எனக் குறிப்பிடுகின்றனர்.

அகநானூறு போன்ற நூல்களில் அரசன் பெயர்களும், அவன் வரலாறுகளும் உவமையாக வருவதையும் இங்கு எண்ணுவோம் 

கூதிர்கால வாடையில் அரண்மனைக் கருவறையில் தலைவி தலைவனை எண்ணி வாடும் காட்சியும், பாசறையில் தலைவன் இருக்கும் காட்சியும் இப்பாடலில் இணைத்துக் காட்டப்பட்டுள்ளன. தலைவியின் “இன்னா அருபடர் தீர, இன்னே முடிகதில் அம்ம” (168) “பாசறைத் தொழிலே” (188) என முடித்துக் காட்டும் இந்தப் பாடலை அகப்பொருள்-பாடல் எனக் கொள்வதே சாலச் சிறந்தது.    

No comments:

Post a Comment

Blog Archive


எழுத்துப் பிழை திருத்தி

சந்திப் பிழை திருத்தி

தமிழ் வலைப்பதிவு திரட்டி