Wednesday, 17 December 2014

புறநானூறு # 135

மலை ஏறுதல்
இக்காலக் காட்சி

பொதியில் நாட்டைப் ‘பொதுமீக்கூற்றம்’ என்றும் வழங்கினர். அது பொதியமலையைச் சூழ்ந்த நாடு. அதன் அரசன் ஆய். அவன் பெருங்கொடையாளி (மா வேள்).
வரிப்புலி விளையாடும் உயர்ந்த மலையின் சிறு வழியில் ஏறுவதால் வருத்தமுற்று, தடவிக்கொண்டு நடக்கும் விறலி என் பின்னே வர, படுமலைப் பண்ணில் வரிப்பாடல் பாடிய, பொன் போன்ற நரம்பினை உடைய யாழைத் தளர்ந்த உள்ளத்தொடு ஒருபக்கம் தழுவிக்கொண்டு, பலரும் புகழும் உன்னை நாடி வந்துள்ளேன். பரிசில் வேண்டுவோரை மன்றத்தில் கண்டால் யானைகளை அதன் கன்றுகளோடு வழங்குவாய் என்கின்றனர். குதிரை, தேர் ஆகியவற்றையும் நீ வழங்குவாய். பாணர், பாடுநர் ஆகியோருக்கும் வழங்குவாய். உன் மூதாதையர் விட்டுச்சென்ற தாயத்தையும் வழங்குவாய். உன் விருப்பம்.

பாடல்

கொடுவரி வழங்கும் கோடு உயர் நெடு வரை,
அரு விடர்ச் சிறு நெறி ஏறலின், வருந்தி,
தடவரல் கொண்ட தகை மெல் ஒதுக்கின்,
வளைக் கை விறலி என் பின்னள் ஆக,
பொன் வார்ந்தன்ன புரி அடங்கு நரம்பின்   5
வரி நவில் பனுவல் புலம் பெயர்ந்து இசைப்ப,
படுமலை நின்ற பயம் கெழு சீறியாழ்
ஒல்கல் உள்ளமொடு ஒரு புடைத் தழீஇ,
புகழ்சால் சிறப்பின் நின் நல் இசை உள்ளி,
வந்தனென் எந்தை! யானே: என்றும்,  10
மன்று படு பரிசிலர்க் காணின், கன்றொடு
கறை அடி யானை இரியல் போக்கும்
மலை கெழு நாடன்! மா வேள் ஆஅய்!
களிறும் அன்றே; மாவும் அன்றே;
ஒளிறு படைப் புரவிய தேரும் அன்றே;            15
பாணர், பாடுநர், பரிசிலர், ஆங்கு அவர்,
தமது எனத் தொடுக்குவராயின், 'எமது' எனப்
பற்றல் தேற்றாப் பயங் கெழு தாயமொடு,
அன்ன ஆக, நின் ஊழி; நின்னைக்
காண்டல் வேண்டிய அளவை வேண்டார்  20
உறு முரண் கடந்த ஆற்றல்
பொது மீக்கூற்றத்து நாடு கிழவோயே!

திணை பாடாண் திணை; துறை பரிசில் துறை.
ஆயை உறையூர் ஏணிச்சேரி முடமோசியார் பாடியது.

காலம் : கி.மு. மூன்றாம் நூற்றாண்டு முதல் கி.பி. இரண்டாம் நூற்றாண்டு


No comments:

Post a Comment

Blog Archive


இந்தக் கருவிகளைப் பயன்படுத்தி உங்கள் கட்டுரையில் பிழையைத் திருத்திக்கொள்ளலாம்.