Monday, 10 November 2014

புறநானூறு 83 Purananuru 83

அடுதோள் முயங்கல்
ஊர் இரண்டுபட்டுக் கிடக்கிறது. (உறையூர் மக்களில் ஒரு சாரார் போர்வைக் கோப்பெருநற்கிள்ளி ஆளவேண்டும் என நினைக்கின்றனர். மற்றொரு சாரார் ஆளும் தித்தன் ஆட்சியை விரும்புகின்றனர்)
கிள்ளி காலடியில் வீரக்கழல் அணிந்துள்ளான். அவனுக்கு கருந்தாடி இப்போதுதான் அரும்புகிறது. அவனைப் பெறும் ஆசையால் என் வளையல் கழன்று நழுவுகிறது. இப்படிக் கழன்றோடுவதை என் தாய் பார்த்துவிடக் கூடாதே என்று நான் அஞ்சுகிறேன்.
(இப்படிக் கழலாமல் இருக்க நான் அவன் தோளைத் தழுவிவிடலாம்). ஆனால் ஊரவையில் அதனைச் செய்ய என் நாணம் தடுக்கிறது.
இப்படி என் மனம் விதுப்புறுகிறது (துடிதுடித்துத் தடுமாறுகிறது).
என்னைப் போல இந்த ஊரும் (அவன் ஆட்சியா, இவன் ஆட்சியா என்று) தடுமாறட்டும்.

ஆட்சித் தடுமாற்றம் பற்றிய செய்தி இப்பாடலில் முதன்மையாக உள்ளமையால் அகப்பொருளில் இணைக்கப்படாமல் புறப்பொருளில் இணைக்கப்பட்டுள்ளது.

பாடல்

அடி புனை தொடுகழல், மை அணல் காளைக்கு என்
தொடி கழித்திடுதல் யான் யாய் அஞ்சுவலே;
அடு தோள் முயங்கல் அவை நாணுவலே;
என் போல் பெரு விதுப்புறுக என்றும்
ஒரு பாற் படாஅதாகி,         5
இரு பாற் பட்ட இம் மையல் ஊரே!

திணை கைக்கிளை; துறை பழிச்சுதல்.
அவனைப் பெருங்கோழிநாய்கன் மகள் நக்கண்ணையார் பாடியது.

காலம் : கி.மு. 3 ஆம் நூற்றாண்டு முதல் கி.பி. 2 ஆம் நூற்றாண்டு


No comments:

Post a Comment

Blog Archive


இந்தக் கருவிகளைப் பயன்படுத்தி உங்கள் கட்டுரையில் பிழையைத் திருத்திக்கொள்ளலாம்.