Monday, 18 March 2019

குறுந்தொகை 70 kurnthogai 70

என்னை வருத்துபவள் குளுமைத் தன்மை உடையவள்.
அவளை இத்தகைய தன்மை உடையவள் என்று எனக்குச் சொல்லத் தெரியவில்லை.
அவள் வாயிலிருந்து மென்மையான சொற்கள் வருகின்றன.
அணைக்கும்போதும் அவள் மென்மையாகவே இருக்கிறாள்.

தலைவன் தன் பாங்கனிடம் சொல்கிறான்.



குறுந்தொகை 69 kurnthogai 69

தன் கணவன்-குரங்கு இறந்துவிட்டது என்பதற்காக, மனைவி-குரங்கு கைம்மைக் கோலத்துடன் வாழ விரும்பாமல், தன் குட்டியை மரக்கிளையில் விட்டுவிட்டு, மலையடுக்கத்தின் உச்சியில் ஏறிக் கீழே பாய்ந்து தன்உயிரை மாய்த்துக்கொள்ளும் சாரல் நாடு உன் நாடு. நாட! இவளுக்காக யாமத்தில் வராதே. உனக்கு ஏதாவது நேர்ந்தால் இவள் தன்னை மாய்த்துக் கொள்வாள். 

தோழி தலைவனிடம் கூறுகிறாள்



குறுந்தொகை 68 kurnthogai 68

குறும்பூழ்ப் பறவையின் கால் விரல்கள் போலப் பயிற்றங் காய்கள் காய்த்திருக்கும் பனிக்காலம் வந்துவிட்டது.
அவர் இன்னும் திரும்பி வரவில்லை.
அவரைத் தழுவிய மார்பு காம நோயால் வருந்திக்கொண்டிருக்கிறது.
இதற்கு மருந்து வேறு இல்லையே!

தலைவி தன் தோழியிடம் சொல்லிக் கலங்குகிறாள்.



குறுந்தொகை 67 kurnthogai 67

ஒருத்தி பொற்காசை நாணில் கோக்க வளைந்த நகம் கொண்ட விரல் இடுக்கில் பிடித்துக்கொண்டு இருப்பது போல் கிளி தன் வாயில் வேப்பம் பழத்தை வைத்துக்கொண்டிருப்பது தோன்றும் காட்டு வழியில் அவர் பொருளீட்டச்  சென்றுள்ளார்.
தோழி! அவர் என்னைப் பற்றி நினைப்பாரோ மாட்டாரோ?

கிளி அலகின் செந்நிறமும் செம்பஞ்சுக் குழம்பு ஊட்டப்பட்ட இரண்டு விரல்களும் - உவமை.

தலைவி தோழியை வினவுகிறாள்


வேப்பம்பழம்

குறுந்தொகை 66 kurnthogai 66

கார் காலத்தில் பூக்கும் கொன்றைப் பூ பூத்துக் குலுங்குகிறதே. 
கார் காலத்தில் திரும்புவேன் என்றவர் திரும்பவில்லையே என்று தலைவி தன் தோழியிடம் சொல்லிக் கலங்குகிறாள். 
தோழி தலைவிக்கு ஆறுதல் கூறுகிறாள். 
பருவம் வராமுன் பெய்த ‘வம்ப மாரி’யைப் பார்த்து இந்தக் கொன்றை தன் மடமையில் பூத்துவிட்டது. 
இந்தக் கொன்றையைப் பார்த்து இது கார்காலம் என்று எண்ணாதே. 

இதனைச் சொடுக்கிப் பாடலும் விளக்கமும்காணலாம்


குறுந்தொகை 65 kurnthogai 65

தெளிந்த ஊற்று நீரைப் பருகிவிட்டு ஆண்மான் தன் பெண்மானுடன் துள்ளி விளையாடிக்கொண்டிருக்கிறது.
இன்னும் திரும்பி வராதவரை நினைத்து வருந்திக்கொண்டிருக்கிறாயா என்று அது என்னைக் கேட்பது போல் எனக்குத் தோன்றுகிறது.

தலைவியின் நினைவலை



குறுந்தொகை 64 kurnthogai 64

பசு மேயச் சென்று திரும்பும்.
அது வரையில் அதன் கன்று தாயை எண்ணி ஏங்கிக்கொண்டிருக்கும்.
அவர் பொருள் ஈட்டச் சென்றுள்ளார்.
நான் கன்று போல் அவரை எண்ணி ஏங்கிக்கொண்டு இருக்கிறேன்.

தலைவி எண்ண ஓட்டம்



Blog Archive


இந்தக் கருவிகளைப் பயன்படுத்தி உங்கள் கட்டுரையில் பிழையைத் திருத்திக்கொள்ளலாம்.